အမိကရင်ပြည်

ပဒိုမန်းရှာ ၄နှစ်ပြည့် အောက်မေ့ဖွယ် အခမ်းအနားနှင့် ၀တ်ဆုတောင်းပွဲကျင်းပ

2012-02-15T08:42:00.000+11:00

Tuesday, 14 February 2012

ဖေဖော်ဝါရီ ၁၄ရက်၊ ၂၀၁၂ခုနှစ်။ စောခါးစူးညား (ကေအိုင်စီ)

ကရင်အမျိုးသားအစည်းအရုံး-KNU ၏ အထွေထွေအတွင်းရေးမှူးချုပ်ဟောင်း ပဒိုမန်းရှာလားဖန်း လုပ်ကြံခံရခြင်း ၄နှစ်ပြည့် အောက်မေ့ဖွယ် အခမ်းအနားနှင့် ၀တ်ပြုဆုတောင်းပွဲတစ်ခုကို ထိုင်း-မြန်မာနယ်စပ်တနေရာတွင် ယနေ့ ပြုလုပ်ကျင်းပခဲ့ရာ လူထုပရိဿတ် ၅၀ဦးကျော် တက်ရောက်ခဲ့သည်။
မြန်မာစစ်အာဏာရှင်အစိုးရအား ဆန့်ကျင်တော်လှန်ရာတွင် သဘောထားပြတ်သားသူဟု လူသိများခဲ့သည့် ပဒိုမန်းရှာသည် ၂၀၀၈ခုနှစ်က လုပ်ကြံခံရပြီးနောက် ၎င်းကို ချစ်ခင်လေးစားကြသည့် ကရင်လူမှုအသိုင်းအ၀ိုင်းနှင့် မြန်မာ့ဒီမိုကရေစီအင်အားစု အဖွဲ့အစည်း အသီးသီးတို့က စုပေါင်း၍ ယခုလို ပဒိုမန်းရှာ အောက်မေ့ဖွယ် အခမ်းအနား ပြုလုပ်ခဲ့ကြခြင်း ဖြစ်သည်။

KNU ခေါင်းဆောင်တစ်ဦးဖြစ်သူ စောသမိန်ထွန်းက “ပဒိုမန်းရှာဟာ ကရင့်တော်လှန်ရေးအပြင် ၈၈ အရေးအခင်းဖြစ်ပွားပြီး KNU နယ်မြေရောက်လာတဲ့ ရောက်လာတဲ့ ကျောင်းသားတွေကို နိုင်ငံရေးလမ်းပြပေးခဲ့တယ်။ ဒါ့အပြင် ဘ၀တူ တိုင်းရင်းသား အဖွဲ့တွေကိုလည်း စည်းရုံးနိုင်ခဲ့သူ ဖြစ်တယ်။”ဟု ပြောသည်။

ထို့အပြင် သူသည် KNU အဖွဲ့ဝင်တစ်ဦးဖြစ်သည်နှင့်အမျှ စစ်အာဏာရှင်စနစ်ကို ဆန့်ကျင်ရာတွင် KNU မူလမ်းစဉ်အတိုင်း လုပ်ကြံခံရသည်အချိန်အထိ မယိမ်းမယိုင်ဘဲ ပြတ်ပြတ်သားသား လုပ်ဆောင်ခဲ့သည်ကို ကြည့်ခြင်းအားဖြင့် နောင်လာနောက် သားများ စံနမူနာယူရမည်ဟု သူက ဖြည့်စွက်ပြောဆိုသည်။
ပဒိုမန်းရှာသည် ၁၉၆၂ခုနှစ်တွင် ရန်ကုန်တက္ကသိုလ်၌ ပညာသင်ကြားရင်း ဆဲဗင်းဇူလိုင် ကျောင်းသားအရေးအခင်းတွင် ပါဝင်ခဲ့သူတစ်ဦး ဖြစ်သည်။ ၁၉၆၆ခုနှစ်တွင် သမိုင်းဘာသာရပ်ဖြင့် ဘွဲ့ရရှိခဲ့သည့် ခေတ်ပညာတတ်တစ်ဦးဖြစ်သည်။
ထိုင်း-မြန်မာနယ်စပ်အခြေစိုက် လူ့ဘောင်သစ်ဒီမိုကရက်တစ်ပါတီ-DPNS မှ ဥက္ကဌဖြစ်သူ ဦးအောင်မိုးဇော်က “အခု ဆရာ (ပဒို မန်းရှာ)တော့ မရှိတော့ဘူးပေါ့နော်။ ဒေါ်လေး(ပဒိုမန်းဇနီး နမ့်ရွှေကျင်)လည်း မရှိတော့ဘူးပေါ့နော်။ ဒါပေမယ့် သူတို့ချစ်မြတ် နိုးတဲ့ တော်လှန်ရေး ပြီးဆုံးတဲ့အထိ ကျနော်တို့ ဆက်ပြီးတော့ ဆောင်ရွက်သွားမယ်လို့ ဒီ ၄နှစ်ပြည့်အခမ်းအနားမှာ ကတိပေး ပါတယ်။”ဟု ပြောသည်။
၈၈ အရေးအခင်းဖြစ်ပွား၍ KNU တော်လှန်ရေးနယ်မြေသို့ ရောက်ရှိခဲ့သည့် ဦးအောင်မိုးဇော်သည့် ပဒိုမန်းရှာနှင့် အနီးကပ် နေထိုင်ခဲ့ဖူးသူဖြစ်ပြီး ထိုကဲ့သို့ နေထိုင်ခွင့်ရခြင်းသည် နိုင်ငံရေး အသိပညာများစွာ တိုးပွားခဲ့သည့်အပြင် အတူတကွ လက်တွဲ ကာ နိုင်ငံရေးလုပ်ခွင့်ရခဲ့သည့်ပေါ် ကံကောင်းကြောင်း သူက ပြောဆိုသည်။
ပဒိုမန်းရှာသည် ၁၉၆၃ခုနှစ်နောက်ပိုင်း KNU သို့ ရောက်ရှိလာသောအခါ တိုင်းရင်းသားလက်နက်ကိုင် အင်အားစုများ အပါအ ၀င် မြန်မာ့ဒီမိုကရေစီအင်အားစုများနှင့် မဟာမိတ်အဖြစ် ဆက်ဆံရာတွင် ပြေပြစ်ချောမွေ့သူတစ်ဦးဟုလည်း သတ်မှတ်ခံထား ရသူ ဖြစ်သည်။
ပြီးခဲ့သည့် ၂၀၀၈ခုနှစ်၊ ဖေဖော်ဝါရီ ၁၄ရက်နေ့က ပဒိုမန်းရှာကို အမည်မသိ သေနတ်သမား ၂ဦးက ၎င်းနေထိုင်ရာ ထိုင်းနိုင်ငံ မဲဆောက်မြို့နေအိမ်၌ လာရောက်ပစ်သတ်ခဲ့သည်။
ယင်းသို့ လုပ်ကြံခံရကာ သေဆုံးသည့်နေ့တွင်ပင် ပဒိုမန်းရှာလားဖန်း၏ ကျန်ရစ်သူ သားသမီးများဖြစ်ကြသော စောစေးစေး ဖန်း၊ နမ့်ဘွားဘွားဖန်း၊ နမ့်ဇိုယာဖန်းနှင့် စလုံ့ဖန်းတို့က ဖခင်နှင့် မိခင်(ကွယ်လွန်)ကို ရည်စူး၍ ဖန်းဖောင်ဒေရှင်းကို စတင် ဖွဲ့ စည်းခဲ့ပြီး နှစ်စဉ် ပဒိုမန်းရှာလူငယ်ခေါင်းဆောင်ဆုကို ချီးမြှင့်ပေးခဲ့သည်။

ပဒိုမန်းငြိမ်းမောင်အမှု တရားဥပဒေအရသာ အကာအကွယ်ယူသွားမည်

2012-02-15T08:38:00.002+11:00

Tuesday, 14 February 2012

ဖေဖော်ဝါရီလ ၁၄ရက်။ ၂၀၁၂။ နန်းသူးလေ (ကေအိုင်စီ)

ကရင်အမျိုးသားအစည်းအရုံး(KNU) ဗဟိုကော်မတီ ခေါင်းဆောင်တဦးဖြစ်သည့် ပဒိုမန်းငြိမ်းမောင်အား ပြစ်မှုကြီးများဖြင့် စွဲချက်တင်ထားရာတွင် လွတ်ငြိမ်းချမ်းသာခွင့်ကို မမျှော်ကိုးပဲ တရားဥပဒေအရသာ အကာအကွယ်ယူ ရင်ဆိုင်ဖြေရှင်းသွား မည်ဟု သူ၏အမှုကို လိုက်ပါဆောင်ရွက်ပေးနေသူ ရှေ့နေဦးကြီးမြင့်က ပြောသည်။

“တရားဥပဒေအရ မဟုတ်တဲ့အရာကို ခုခံကာကွယ်ရမယ်။ မဟုတ်တဲ့ဟာနဲ့ အပြစ်ပေးမခံနိုင်ဘူး။”ဟု ရှေ့နေ ဦးကြီးမြင့်က ပြောသည်။
ယမန်နေ့က ရန်ကုန်မြို့ အင်းစိန်ထောင်တွင်း တရားရုံး၌ ပဒိုမန်းငြိမ်းမောင်အမှုကို စစ်ဆေးကြားနာပြီးနောက် ယင်းသို့ ပြောကြားခဲ့ခြင်း ဖြစ်သည်။ ပဒိုမန်းငြိမ်းမောင်အား နိုင်ငံတော်ကို စစ်မက်ပြိုင်ဆိုင် တိုက်ခိုက်မှု ပုဒ်မ- ၁၂၂(၁)နှင့် မတရား အသင်း ပုဒ်မ- ၁၇(၁)တို့ဖြင့် စွဲချက်တင်ထားပြီးနောက်ပိုင်း ဒုတိယအကြိမ်မြောက် တရားလိုပြသက်သေ တရားရုံးထုတ် စစ်ဆေးခဲ့ခြင်း ဖြစ်သည်။
ပုဒ်မ-၁၂၂(၁) သည် သေဒဏ်မှ တသက်တကျွန်းအထိ ချမှတ်နိုင်ပြီး ပုဒ်မ ၁၇(၁)သည် ထောင်ဒဏ် ၂နှစ်မှ ၃နှစ်အထိ ချ မှတ်နိုင်ကြောင်း ဦးကြီးမြင့်က ဆိုသည်။ လာမည့် ဖေဖော်ဝါရီ ၁၆ရက်နေ့တွင် ပဒိုမန်းငြိမ်းမောင်အား ရုံးထုတ်စစ်ဆေးမည် ဖြစ်သည်။
ယခုနှစ်ဆန်းပိုင်းက ကေအဲန်ယူနှင့် အစိုးရတို့ကြား ငြိမ်းချမ်းရေး ပဏာမ သဘောတူညီမှု ရရှိခဲ့ပြီးနောက် ပဒိုမန်းငြိမ်းမောင် အား လွတ်ငြိမ်းချမ်းသာခွင့်ပေးမည်ဟု သတင်းများ ထွက်ပေါ်နေသော်လည်း ယင်းအပေါ် ယုံကြည်၍ မရနိုင်ကြောင်း လည်း ဦးကြီးမြင့်က ပြောသည်။
၎င်းက “မသေချာသေးဘူးလေ။ မသေချာတဲ့ဟာကို ကျနော်တို့က သွားယုံလို့မရဘူး။”ဟု ပြောသည်။
ပဒိုမန်းငြိမ်းမောင်ကမူ ၎င်းအနေဖြင့် ငြိမ်းချမ်းရေးအတွက် ဆောင်ရွက်နေခြင်းဖြစ်ကြောင်း၊ မိမိပါဝင်ဆောင်ရွက်ပေးရန် အ ကူအညီတောင်းပြီးမှ အဖမ်းခံရသဖြင့် ကတိဖျက်ခံရသကဲ့သို့ ခံစားရသည်ဟု ပြောဆိုကြောင်း ပဒိုမန်းငြိမ်းမောင်၏ ပြောပြ ချက်ကို ရှေ့နေဦးကြီးမြင့်က ကေအိုင်စီကို ပြန်လည် ပြောဆိုသော်လည်း မည်သို့အကူအညီ တောင်းသည်ကိုမူ ရှင်းပြခဲ့ ခြင်း မရှိပေ။
ယမန်နေ့က ကြားနာမှုတွင် မြန်မာနိုင်ငံရဲ သတင်းတပ်ဖွဲ့မှ တရားလိုပြသက်သေ ၆ဦးအနက် ရဲမှူးအောင်ရွှေ၊ ဒုရဲမှူးမြင့် ကြည်နှင့် ရဲအုပ်ဝေဇင်တို့ ၃ဦးအား မနက် ၁၁နာရီမှ နေ့လည် ၁နာရီအထိ ရုံးထုတ် စစ်ဆေးခဲ့သည်။
တရားလိုပြ သက်သေများဘက်မှ ကေအဲန်ယူနှင့်ပတ်သက်သည့် မှတ်တမ်းများကို တင်ပြခဲ့ကြပြီး ထိုအထဲမှ မမှန်ကန် သည့် အချက်အလက်များ၊ မှားယွင်းနေသည့် ထွက်ဆိုချက်နှင့် တင်ပြချက်များကို မိမိတို့ဘက်မှ တရားဥပဒေအရ ပြန် လည် ထောက်ပြခဲ့သည်ဟု ရှေ့နေ ဦးကြီးမြင့်က ပြောသည်။
ပဒိုမန်းငြိမ်းမောင်သည် ယမန်နှစ် ဇူလိုင်လက ထိုင်းနိုင်ငံမှတဆင့် တရုတ်နိုင်ငံသို့ သွားရောက်ခဲ့သည့် ခရီးစဉ်တွင် ပျောက် ဆုံးခဲ့ပြီး မြန်မာနိုင်ငံသို့ ပြန်လည်ပို့ဆောင်ခံရကာ အထက်ပါစွဲချက်များဖြင့် စွပ်စွဲခံရပြီး အမှုရင်ဆိုင်နေရခြင်း ဖြစ်သည်။
ပြီးခဲ့သည့် ဖေဖော်ဝါရီလ ၉ရက်နေ့တွင် ပဒိုမန်းငြိမ်းမောင်အမှုနှင့် ပတ်သက်ပြီး တရားလိုပြသက်သေများအား ရုံးထုတ် စစ် ဆေးခဲ့ပြီးဖြစ်သည်။
ပဒိုမန်းငြိမ်းမောင်သည် ကရင်အမျိုးသားအစည်းအရုံး(KNU)တွင် ဗဟိုကော်မတီဝင်တစ်ဦးဖြစ်သည့်အပြင် တိုင်းရင်းသား လက်နက်ကိုင်အဖွဲ့(၁၂)ဖွဲ့ဖြင့် ပူးပေါင်းဖွဲ့စည်းထားသည့် ညီညွှတ်သော တိုင်းရင်းသားလူမျိုးများ ဖက်ဒရယ်ကောင်စီ (UN-FC) တွင်လည်း ကော်မတီဝင်တစ်ဦး ဖြစ်သည်။

ချစ်သမီးသို့

2012-02-14T22:46:00.003+11:00

ရေဆန်

သမီးရေ
ဂန္တ၀င်ခရီးမှာ
နေ့ခင်းကြောင်တောင်
နေရောင်ခြည်အောက်
တောင်မြောက်ဘယ်မှာ
မသိပါ၍
ရပ်နေသူများလည်း ရှိပါသည်။

ညဉ့်နက် သန်းခေါင်
လမ်းစမှောင်လည်း
တောင်မြောက်သေချာ
သိနေပါ၍
လိုရာသွားနေသူလည်း ရှိပါသည်။

လေပြင်းအတိုက်
လှိုင်းအရိုက်မှာ
ငိုရှိုက်အော်မြည်
ဆောက်တည်ရာမဲ့
လွင့်ပျက်နေသူတွေလည်း ရှိပါသည်။

မှုန်တိုင်းကထန်
လှိုင်းကထန်လည်း
ရေဆန်လေကြမ်း
ခရီးလမ်းကို
ဖြတ်သန်းနေသူတွေလည်း ရှိပါသည်။

သမီးရေ
စေတနာနှင့် အသိ
သတိနှင့် သီလ
ဝိရိယနှင့် ပညာ
သစ္စာနှင့် သမာဓိ
သတ္တိနှင့် စွန့်လွတ်မှု
အရင်းပြု ခရီးနှင်
ဂန္တ၀င်ရက်မြတ်
ရဲရဲဖြတ်လော့သမီး

တိုင်းရင်းသားခေါင်းဆောင်များ၏ ပင်လုံညီလာခံအပေါ် သုံးသပ်ချက်

2012-02-13T23:14:00.002+11:00

#fullpost { display: none; } February 12, 2012 by နန်းမြနဒီ

လွန်ခဲ့တဲ့ ၁၉၄၇ ခုနှစ် ဖေဖော်ဝါရီ ၁၂ ရက်နေ့က ရှမ်းပြည်နယ် ပင်လုံမြို့မှာ ဗိုလ်ချုပ်အောင်ဆန်းနဲ့ တိုင်းရင်းသားခေါင်းဆောင်တွေ မြန်မာနိုင်ငံလွတ်လပ်ရေး အတူတူ ရယူဖို့၊ လွတ်လပ်ရေးရပြီးလို့ ဆယ်နှစ်ကြာရင် ခွဲထွက်လိုက ခွဲထွက်နိုင်တယ်လို့ တောင်တန်းပြည်မ ပူးပေါင်းစာချုပ် ချုပ်ဆိုပြီး လက်မှတ်ရေးထိုးခဲ့ပါတယ်။

ဒါပေမယ့် ဆယ်နှစ်ကျော်ကြာလာတဲ့အခါ အာဏာရအစိုးရတွေရဲ့ အုပ်ချုပ်ရေးဟာ တန်းတူညီမျှမှုမရှိတာ၊ ခွဲခြားအုပ်ချုပ်တာ၊ လူ့အခွင့်အရေးချိုးဖောက်မှုတွေ ခံရတာ၊ ပင်လုံစာချုပ်ပါ ကတိက၀တ်တွေကို အစိုးရက ဖောက်ဖျက်တာ ခံစားရတဲ့အတွက် တိုင်းရင်းသားလက်နက်ကိုင် တော်လှန်ရေး အဖွဲ့တွေ ပေါ်ပေါက်ခဲ့ပြီး ပြည်တွင်းစစ်တွေ ဖြစ်ပွားခဲ့ရပါတယ်။

၂၀၁၁ ခုနှစ်မှာ ဦးသိန်းစိန် အစိုးရ တက်လာပြီးနောက်ပိုင်း တိုင်းရင်းသား လက်နက်ကိုင်အဖွဲ့တွေနဲ့ အပစ်အခတ်ရပ်ရေး၊ ငြိမ်းချမ်းရေး ဆွေးနွေးပွဲတွေ လုပ်ဆောင်လာခဲ့တယ်။ လက်နက်ကိုင်အဖွဲ့အားလုံးနဲ့ ငြိမ်းချမ်းရေး သဘောတူညီချက် ရပြီးရင် တိုင်းရင်းသားလက်နက်ကိုင်အဖွဲ့၊ နိုင်ငံရေးပါတီအဖွဲ့၊ အစိုးရကိုယ်စားလှယ်အဖွဲ့ ပြည်သူ့ကိုယ်စားလှယ်တွေပါ အားလုံး ပါဝင်တဲ့ ပင်လုံညီလာခံနဲ့ တူတဲ့ ညီလာခံကြီးကို နေပြည်တော်မှာ ကျင်းပမယ်လို့ အစိုးရဘက်က ပြောကြားခဲ့ပါတယ်။

ဒါနဲ့ပတ်သက်ပြီးတော့ လက်လှမ်းမီသမျှ တိုင်းရင်းသား နိုင်ငံရေး ခေါင်းဆောင်တွေရဲ့ အမြင်ကို ဆက်သွယ်မေးမြန်းထားပါတယ်။

ဦးပူကျင့်ရှင်းထန် (ဇိုမီးချင်းအမျိုးသားကွန်ဂရက်-ဥက္ကဋ္ဌ)

“သဘောတူတဲ့အတိုင်း မဖြစ်လာသေးလို့ မပြီးပြတ်တဲ့ သဘောတူညီမှုလို ဖြစ်နေတော့ ပြည်ထောင်စု မြန်မာနိုင်ငံမှာ သေနတ်သံတွေမစဲပဲ ဖြစ်နေတာတွေကို တိတ်အောင် ကျနော်တို့ ဒီကိစ္စကို အစသဘောတူတဲ့အတိုင်း ပြန်လည်ဖြေကြား ဆွေးနွေးတိုင်ပင်ပြီးတော့ လုပ်ရအောင်ဆိုပြီးတော့ ၂၀၁၁ ညီလာခံမှာ ကြေညာထားထာပါ။ ကျနော်တို့ထက် ဒေါ်အောင်ဆန်းစုကြည်က ဆက်လက်ပြီးတော့ ဆောင်ရွက်ပါဆိုတာ သူ့လက်ထဲကို ကျနော်ကိုယ်တိုင်အပ်ပြီးတော့ လုပ်ထားတာပါ။ ဒါမှတပါး ကျန်တဲ့ဥစ္စာ ဘာမှမရှိပါဘူး ဆိုတာ အခုထိ ကျနော်တို့ အဲလိုပဲ ခံယူနေတာပါ။”

ဦးခွန်ထွန်းဦး (ရှမ်းအမျိုးသားများ ဒီမိုကရေစီအဖွဲ့ချုပ် ဥက္ကဋ္ဌ)

“ပွင့်ပွင့်လင်းလင်းပြောရင် ဒုတိယအကြိမ်မကလို့ ဘယ်နှကြိမ်ပဲခေါ်ခေါ် လွတ်လပ်ခြင်းရဲ့ အနှစ်သာရကတော့ ပေါ်လွင်ဖို့အရေးကြီးတယ်။ အဓိကတော့ ရိုးသားဖြူစင်ဖို့ပဲ။ နှစ်ပေါင်း ၆၀ ကျော်ခဲ့ပြီ။ အနာသိဆေးရှိ ဖြစ်စေချင်တယ်။ အခြေခံဥပဒေအရ တိုင်းရင်းသားတွေအားလုံး ရချင်တဲ့အခြေခံဥပဒေမျိုး ပြုလုပ်တာ ရေးကိုရေးရမယ်။ မရေးလို့ကို မဖြစ်ဘူး။”

ပဒိုဒေးဗစ်သာကပေါ (ကရင်အမျိုးသားအစည်းအရုံး ဒုဥက္ကဋ္ဌ)

“ညီလာခံလုပ်မယ်လို့ တဖွဖွ ပြောနေတာပဲ။ ကျနော်တို့နဲ့တွေ့တဲ့ ၀န်ကြီးကတော့၊ လုပ်ပြီးတော့ အခြေခံဥပဒေ ပြောင်းစရာရှိလည်း ပြောင်းပေါ့။ အခြေခံဥပဒေ ပြောင်းဖို့က ၇၅ ရာခိုင်နှုန်းကျော်ရမယ်။ နောက်ပြီး ကျနော်တို့ ကိုယ်စားပြုတဲ့ ပါလီမန်မှာ အမတ်တွေမှမရှိဘဲ။ ဒါပေမယ့် ကျနော်တို့က လုပ်ကြည့်ရမှာပေါ့။ ငြိမ်းချမ်းရေးအတွက်က တွန်းကြည့်ရမှာပေါ့။ ကျနော်တို့က လိုချင်တာက တိုတိုလိုရင်းပြောရရင် စစ်မှန်တဲ့ပြည်ထောင်စုပေါ့။ အတုအယောင် ပြည်ထောင်စု၊ နာမည်ခံပြည်ထောင်စု မဟုတ်ဘူး။ စစ်မှန်တဲ့ ပြည်ထောင်စုအတွက် ကျနော်တို့က တိုက်ပွဲဆက်ဝင်ရမှာပဲ။ စစ်မှန်တဲ့ ပြည်ထောင်စု ပေါ်ပေါက်လာရင်တော့ တကယ့်ခိုင်မာတဲ့ ငြိမ်းချမ်းရေး ဖြစ်လာမှာ။”

ခူးဦးရယ် (ကရင်နီအမျိုးသား တိုးတက်ရေးပါတီ – အထွေထွေအတွင်းရေးမှူး)

“သမ္မတဦးသိန်းစိန် ဦးဆောင်တဲ့အစိုးရက ပင်လုံညီလာခံတဲ့၊ ကျယ်ပြန့်တဲ့ တွေ့ဆုံဆွေးနွေးမှုတွေ ဖြစ်ပေါ်ဖို့၊ ညီလာခံမျိုး ဖြစ်ပေါ်ဖို့ သူတို့က လေသံထွက်နေတာ ဆိုတော့ ကျနော်တို့က သူတို့ရဲ့ လိုချင်တဲ့ပုံသဏ္ဌာန်အတိုင်းပဲ သွားဖို့များပါတယ်။ ကျနော်တို့မြင်ချင်တဲ့ ဒုတိယ ပင်လုံညီလာခံမျိုး ဖြစ်ချင်မှဖြစ်မှာပါ။ ကျနော်တို့ ဖြစ်ချင်တာကတော့ ကိုယ်စားပြုတဲ့ အနေအထားရှိတဲ့ သက်ဆိုင်ရာ အဖွဲ့အစည်းတွေက ကိုယ်စားပြု ဆွေးနွေးနိုင်တဲ့ ညီလာခံမျိုးကို လိုချင်တာပါ။ ကိုယ်စားပြုမှုအရဆိုတာ လူမျိုးအရကော၊ ပထ၀ီအနေအထားအရ၊ ပြည်နယ် အနေအထားအရ၊ သမိုင်းကြောင်းအရ အခြေခံရှိတဲ့ အနေအထားမျိုးနဲ့ ပါဝင်သင့်ပါဝင်ထိုက်တဲ့ အစုအဖွဲ့တွေ ပါဝင်နိုင်တဲ့၊ ဆွေးနွေးပိုင်ခွင့်ရှိတဲ့ ကိုယ်စားပြုမှုမျိုး ပါဝင်တဲ့ ညီလာခံမျိုးကို ဆိုလိုတာပါ။”

နိုင်ငွေသိန်း (မွန်ဒေသလုံးဆိုင်ရာ ဒီမိုကရေစီပါတီ – ဥက္ကဋ္ဌ)

“ပင်လုံအပေါ်မှာ အခြေခံတဲ့ ပြည်ထောင်စုကို လိုချင်ပါတယ်။ တနည်းအားဖြင့် ပြောမယ်ဆိုရင် ပင်လုံအခြေခံကတော့ တန်းတူအရေး၊ တိုင်းရင်းသားတွေ ကိုယ်ပိုင်ပြဋ္ဌာန်းခွင့်၊ စစ်မှန်သော ဖက်ဒရယ်ပြည်ထောင်စုကို သွားချင်ပါတယ်။ ဒါပေမယ့် တခါမှလည်း မရခဲ့ဘူးလေ။ ဒီလိုခေါ်မယ်ဆိုရင် အားရ၀မ်းသာနဲ့ ကြိုဆိုမှာပဲ။”

ဦးသာဘန်း (ရခိုင်ဒီမိုကရေစီအဖွဲ့ချုပ် ယာယီဥက္ကဋ္ဌ)

“တိုင်းရင်းသားတွေ လိုလားတဲ့ စစ်မှန်တဲ့ပြည်ထောင်စု ရရေးအတွက် ဒုတိယ ပင်လုံပဲခေါ်ခေါ်၊ သူတို့ကျင်းပမယ့် ပင်လုံထက်ကျယ်ပြန့်တဲ့ ညီလာခံပဲခေါ်ခေါ် ကျနော်တို့ တိုင်းရင်းသားတွေက ဒီနေ့အချိန်မှာ ခွဲထွက်ရေးကို ပြောနေတာ မဟုတ်ပါဘူး။ ပြည်ထောင်စု အတွင်းမှာ တန်းတူရေးနဲ့ ကိုယ်ပိုင်ပြဋ္ဌာန်းခွင့် ရရှိရေးကို ဆွေးနွေးကြမယ်။ ကျယ်ပြန့်စွာ ညှိနှိုင်းပြီးတော့ ရင်ထဲမှာ ပွင့်ပွင့်လင်းလင်း ဆွေးနွေးမယ်ဆိုရင် ကြိုဆိုပါတယ်။ ဒါပေမယ့် ကောက်ကျစ်တဲ့ပုံစံနဲ့ လုပ်တယ်ဆိုရင်တော့ ကန့်ကွက်တယ်။”

ဗိုလ်မှူးကြီး ဂျိမ်း(စ်)လွမ်ဒေါင် (ကချင်လွတ်မြောက်ရေးအဖွဲ့ ဒု-နိုင်ငံခြားရေးတာဝန်ခံ )

“ယုံကြည်ပါတယ်။ လွန်ခဲ့တဲ့အချိန်မှာ ကျနော်တို့အချင်းချင်း ဘယ်တော့မှ လက်တွေ့မကျတဲ့ကိစ္စ၊ ကျနော်တို့ခေါင်းဆောင်တွေက ပြောတဲ့အတိုင်း လုပ်တော့မှ အဲဒါ လက်တွေ့ကျလာပါလိမ့်မယ်။ ကမ္ဘာပေါ်မှာ ထည်ထည်ဝါ၀ါ တခြားတိုင်းပြည်လို ကျနော်တို့ နေရဖို့က အချိန်ရောက်ပါပြီ။ အဲဒါကြောင့် ကျနော်တို့အားလုံးလည်း အဲဒါကို ဆန္ဒပြုရင်းနဲ့ ဆုတောင်းမေတ္တာ ၀ိုင်းပို့ရအောင် ဆော်ဩချင်ပါတယ်။”
http://burmese.dvb.no/archives/21112

လက်နက်ကိုင် ပဋိပက္ခ ချုပ်ငြိမ်းဖို့ သမ္မတဦးသိန်းစိန် တိုက်တွန်း

2012-02-13T22:53:00.001+11:00

တနင်္ဂနွေ, 12 ဖေဖော်ဝါရီ 2012

By မသိင်္ဂီထိုက်

စစ်မှန်တဲ့ပြည်ထောင်စုကို လက်တွေ့ တည်ဆောက် အကောင်အထည် ဖော်နိုင်မယ့် အခြေအနေတွေ တွေ့နေရပြီ ဆိုပြီး ဒီကနေ့ (၆၅) နှစ်မြောက် ပြည်ထောင်စုနေ့မှာ မြန်မာ့ ဒီမိုကရေစီခေါင်းဆောင် ဒေါ်အောင်ဆန်းစုကြည်က ပြောဆိုလိုက်ပါတယ်။ သမ္မတ ဦးသိန်းစိန် ကတော့ ပြည်ထောင်စုအတွက် ပြည်တွင်း လက်နက်ကိုင် ပဋိပက္ခတွေ ရပ်ဆိုင်းကြဖို့ တိုက်တွန်းလိုက်ပါတယ်။ ဒီကနေ့ မြန်မာပြည် တ၀ှမ်းက ပြည်ထောင်စုနေ့ အခမ်းအနားတွေ အပြင် လက်တလော တိုက်ပွဲတွေ ဖြစ်နေတဲ့ တိုင်းရင်းသား လက်နက်ကိုင် အဖွဲ့ ကေအိုင်အိုက ဘယ်လို တုံ့ပြန် ပြောကြားလိုက်သလဲ ဆိုတာကိုတော့ မသိင်္ဂီထိုက်က စုစည်းတင်ပြထားပါတယ်။

တိုင်းရင်းသား အဖွဲ့အစည်းတွေနဲ့ အမျိုးသား ဒီမိုကရေစီ အဖွဲ့ချုပ်တို့ဟာ ၁၉၉၈ ခုနှစ် နောက်ပိုင်းမှာ လက်တွဲမဖြုတ်ဘဲ မြန်မာ့ နိုင်ငံရေးလောကမှာ အတူလက်တွဲ လုပ်ဆောင်နိုင်ခဲ့တာကို ကြည့်ရင် တကယ် စစ်မှန်တဲ့ ပြည်ထောင်စုကြီးကို တည်ထောင်နိုင်တယ်ဆိုတာကို အမျိုးသား ဒီမိုကရေစီ အဖွဲ့ချုပ် အနေနဲ့ ယုံကြည်မှု ရှိတယ် ဆိုပြီး မြန်မာ့ ဒီမိုကရေစီ ခေါင်းဆောင် ဒေါ်အောင်ဆန်းစုကြည်က ဒီကနေ့ အမျိုးသား ဒီမိုကရေစီ အဖွဲ့ချုပ် ရုံးမှာ ပြုလုပ်တဲ့ (၆၅) နှစ်မြောက် ပြည်ထောင်စုနေ့ အခမ်းအနားမှာ ပြောသွားပါတယ်။ ဒီတိုင်းရင်းသား အဖွဲ့အစည်းတွေဟာ ၁၉၉၀ ရွေးကောက်ပွဲ နောက်ပိုင်း ပါတီဖျက်သိမ်းခံရတာတွေ ဖမ်းဆီးခံရတာတွေ ရှိနေပေမဲ့ အန်အယ်လ်ဒီနဲ့ တသားတည်း ရပ်တည်ခဲ့ကြတယ်လို့လည်း ပြောသွားပါတယ်။ ဒါ့အပြင် စစ်မှန်တဲ့ ပြည်ထောင်စုကို ဘယ်လို သွားကြမလဲ ဆိုတာကိုလည်း အခုလို ပြောဆိုလိုက်ပါတယ်။
“ပင်လုံစာချုပ်ကို အခြေခံဟာ ပြည်ထောင်စု တိုင်းရင်းသား အားလုံးကြားထဲမှာ ယုံကြည် စိတ်ချမှု၊ တစ်ဦးအပေါ်တစ်ဦး လေးစားမှု၊ တစ်ဦးပေါ်တစ်ဦး ယုံကြည်မှု၊ တစ်ဦးပေါ်တစ်ဦး သစ္စာရှိမှုအပေါ်မှာ အခြေခံတာပါ။ ဒါကြောင့် အခုထိ တိုင်းရင်းသားများက နောင် ပြည်ထောင်စုတစ်ခုကို၊ နောင် စစ်မှန်တဲ့ ဒီမိုကရေစီ ပြည်ထောင်စုတစ်ခုကို တည်ထောင်ဖို့ ဆိုတာဟာ ပင်လုံစာချုပ်ရဲ့ စိတ်ဓါတ်၊ ပင်လုံစာချုပ် အပေါ်မှာ အခြေခံရမယ်လို့ ထပ်တလဲလဲ ပြောနေတာ ဒီဟာတွေကြောင့် ဖြစ်တယ်လို့ ကျမတို့ ထင်ပါတယ်။”
တိုင်းရင်းသား ပါတီတွေလည်း ဒီကနေ့ ရန်ကုန်မြို့တော်မှာ ပြည်ထောင်စုနေ့ အထိမ်အမှတ်ပွဲ ကျင်းပခဲ့ကြပါသေးတယ်။ ညနေပိုင်းမှာ ကျင်းပတဲ့ ဒီပွဲကို မြန်မာ့ ဒီမိုကရေစီ ခေါင်းဆောင် ဒေါ်အောင်ဆန်းစုကြည်လည်း တက်ရောက်ခဲ့ပြီး တိုင်းရင်းသား စည်းလုံးညီညွတ်ရေး စစ်မှန်တဲ့ ပြည်ထောင်စု တည်ဆောက်ရေးနဲ့ ပတ်သက်ပြီး တိုင်းရင်းသား ပါတီတွေနဲ့ ဆွေးနွေးခဲ့ကြတယ်လို့လည်း ရခိုင်တိုင်းရင်းသား ပါတီက ဒေါက်တာ အေးမောင်က ပြောပါတယ်။
“ပင်လုံညီလာခံက မျှော်မှန်းခဲ့တဲ့အတိုင်း ဒီကနေ့ ရောက်နေသလား၊ မရောက်ဘူးလား ဆိုတာကို ပြန် သုံးသပ်ဖို့လိုတယ် ဆိုတာကို ကိုယ့်အမြင် သူ့အမြင်နဲ့ သုံးသပ် ဝေဖန်ကြပါတယ်။ ဒေါ်အောင်ဆန်းစုကြည် မိန့်ခွန်းပြောတဲ့အခါမှာလည်း စစ်မှန်တဲ့ ပြည်ထောင်စုကို ကျမတို့ တည်ဆောက်ဖို့ လိုပြီဆိုတာကို သူ ညွှန်း ဖော်ပြသွားတာ တော်တော်လည်း တိုင်းရင်းသားတွေ လက်ခုပ်သြဘာ တီးကြပါတယ်။”
နိုင်ငံတော် စစ်တပ် အင်အားကို ခိုင်မာတောင့်တင်းအောင် သားစဉ်မြေးဆက် တည်ဆောက်ထားဖို့ စစ်တပ် အင်အား မကောင်းရင် တိုင်းရင်းသား ပြည်သူတွေ အနေနဲ့ အင်အားကြီး နိုင်ငံတွေရဲ့ အနိုင်အထက် ပြုကျင့်တာကို ခံရမှာ ဖြစ်တယ်၊ ဒါကြောင့် မြန်မာ့ တပ်မတော်ကို ခေတ်မီတပ်မတော် ဖြစ်အောင် ဖွဲ့စည်းတာမှာ တိုင်းရင်းသား အားလုံး ပါဝင် လုပ်ဆောင်ရမယ်လို့ ဒီကနေ့ ပြည်ထောင်စုနေ့ သ၀ဏ်လွှာ အဖြစ်နဲ့ သမ္မတ ဦးသိန်းစိန်က ပြောကြားပါတယ်။
ဒါ့အပြင် တိုင်းရင်းသား လက်နက်ကိုင် ပဋိပက္ခတွေ အဆုံးသတ်ကြဖို့လည်း သူက တိုက်တွန်းထားတာပါ။
ကချင် လွတ်လပ်ရေးအဖွဲ့ (ကေအိုင်အို) ရဲ့ ဗဟိုအလုပ်အမှုဆောင် ကော်မတီဝင် ဗိုလ်မှူးကြီး ဂျိမ်းစ်လွန်ဒေါင်းကတော့ မြန်မာ အစိုးရက ပြောဆိုနေတဲ့ စစ်မှန်တဲ့ ပြည်ထောင်စု တည်ဆောက်လိုတယ် ဆိုတာကို သံသယ ရှိတယ်လို့ ပြောဆိုလိုက်ပါတယ်။
“မနှစ်တုန်းက မတ်လ ၃၀ ရက်နေ့ကနေ ဒီအစိုးရ တက်လာတယ်။ အဲဒီနေ့ကနေ စပြီးတော့မှ ငြိမ်းချမ်းရေးက သူ ပြောနေတာပဲ။ နောက် တပြည်လုံးက လူတွေကိုလည်း ခေါ်တယ်။ နောက် သူ့ရဲ့စစ်ဗိုလ်ချုပ်တွေကိုလည်း အမိန့်ပေးတယ်။ အပစ်အခတ် ရပ်စဲဖို့ရာ ပြန်ပြီးတော့ ခေါ်ယူဖို့ ဆိုပြီးတော့ အဲဒီ အမိန့်ပေးတဲ့ စစ်တပ်တွေကတော့ ပိုပြီးတော့ ပို့တယ်၊ ၁၂ ရက် ပြည်ထောင်စုနေ့မှာ ကျနော်တို့ဘက်မှာ ဘယ်လောက် အချင်းချင်း သတ်ဖြတ်ကြသလဲ။ အဲဒီတော့ သူကတော့ နေပြည်တော်မှာ အော်နေတယ်။ ပြည်ထောင်စု စိတ်ဓါတ် မွေးမြူပြီးတော့မှ ကျနော်တို့ တိုင်းပြည်ဟာ ငြိမ်းချမ်းလာတာကို ကျနော်တို့ မြင်ချင်ပါတယ်။ ငြိမ်းချမ်းလာတာကို ကျနော်ကတော့ ခံစားရတာ မျက်စိအားဖြင့်သော်လည်းကောင်း ခံစားချက်ကို လိုချင်ပါတယ်။ ဒါကြောင့် ကျနော်တို့က လွန်ခဲ့တဲအချိန်ကို ထားလိုက်ပါ။ အခု ပြည်ထောင်စုနေ့ကစပြီး ရှေ့ရှုပြီးတော့မှ အပြောနဲ့အလုပ် လက်တွေ့ ညီပါစေ။”
ဒီအစိုးရ တက်လာပြီးတဲ့ နောက်ပိုင်း တိုင်းရင်းသား လက်နက်ကိုင် အဖွဲ့တချို့နဲ့ အပစ်အခတ် ရပ်စဲရေး ပဏာမ သဘောတူညီမှုတွေ ရရှိထားပေမဲ့ အပစ်ရပ် တိုင်းရင်းသား လက်နက်ကိုင်အဖွဲ့ ကေအိုင်အိုနဲ့တော့ အပစ်အခတ်ရပ်ဆဲရေး သဘောတူညီချက် ပျက်ပျယ်ခဲ့ပြီး စစ်ရေး တင်းမာမှုတွေ ရှိနေဆဲ ဖြစ်ပါတယ်။

ဒေါ်အောင်စုကြည်၏ ပြည်ထောင်စုနေ့ပြောကြားချက်

2012-02-13T09:01:00.000+11:00

ဧရာဝတီ Blog

KIA နဲ့ မြန်မာစစ်တပ် တရုတ်စေ့စပ်ပေး

2012-02-10T20:30:00.004+11:00

ကြာသပတေး, 09 ဖေဖော်ဝါရီ 2012

By ကိုအောင်ျေကာ်ဦး

မြန်မာအစိုးရက မကြာသေးခင်ကစလို့ တိုင်းရင်းသား လက်နက်ကိုင် အဖွဲ့တွေနဲ့ အပစ်အခတ် ရပ်စဲရေး သဘောတူညီချက်တွေ ဆက်တိုက်ဆိုသလို လက်မှတ်ရေးထိုးနေပေမဲ့ အဓိကအဖွဲ့တခုဖြစ်တဲ့ ကချင်လွတ်မြောက်ရေးအဖွဲ့ (KIO) နဲ့ ပြေလည်မှု မရနိုင်သေးဘဲ ဖြစ်နေရတဲ့အတွက် အိမ်နီးချင်း တရုတ်နိုင်ငံ၊ နယ်စပ်ဒေသ ငြိမ်းချမ်းရေးအပေါ် ခြိမ်းခြောက်မှုတရပ် ဖြစ်နေရပါတယ်။

တရုတ်နိုင်ငံကတော့ သူ့ရဲ့နယ်စပ်ဒေသ တည်ငြိမ်မှုရစေရေး မြန်မာအာဏာပိုင်တွေနဲ့ လက်နက်ကိုင် အဖွဲ့တွေကြား တိုးတိုးတိတ်တိတ် ငြိမ်းချမ်းရေး ဆွေးနွေးပွဲတွေဖြစ်စေဖို့ ကြားဝင်စေ့စပ်ပေးနေတာပါ။ ဒီအကြောင်း ဗွီအိုအေ သတင်းထောက် Daniel Schearf သတင်းပေးပို့ ထားတာကိုတော့ ကိုအောင်လွင်ဦး က ပြောပြပေးမှာ ဖြစ်ပါတယ်။
အရင်းအမြစ် ပေါကြွယ်ဝတဲ့ မြန်မာနိုင်ငံမြောက်ပိုင်း ကချင်ပြည်နယ်ထဲမှာ ကချင်လွတ်မြောက်ရေးအဖွဲ့ (KIO) နဲ့ ၁၇ နှစ်ကြာ အပစ်အခတ် ရပ်စဲရေး သဘောတူညီချက် ပျက်ပြားခဲ့တဲ့ ပြီးခဲ့တဲ့နှစ် ဇွန်လကစလို့ ပဋိပက္ခတွေ ပေါ်ပေါက်နေတာ ဖြစ်ပါတယ်။ တိုက်ပွဲတွေကြောင့် အိုးပစ်အိမ်ပစ် စွန့်ခွာထွက်ပြေးကြရတဲ့ ဒေသခံပေါင်း ၆၀,၀၀၀ ကျော်လောက်အထိ ရှိမယ်လို့လည်း အကူအညီပေးရေး အဖွဲ့အစည်းတွေက ခန့်မှန်းထားကြတာပါ။
ဒါပေမဲ့လည်း မြန်မာနဲ့ တရုတ် အာဏာပိုင်တွေဘက်က ဒုက္ခသည် ပြဿနာနဲ့ ပတ်သက်လို့ ပွင့်ပွင့်လင်းလင်း ပြောဆိုတာမျိုး မရှိသလို နိုင်ငံတကာ အဖွဲ့အစည်းတွေနဲ့ သတင်းဌာနတွေ သွားရောက်ဖို့ အကန့်အသတ် ရှိနေတာမို့ အခြေအနေ အတိအကျကိုတော့ မသိနိုင်ပါဘူး။ ထိုင်ဝမ်မှာရှိတဲ့ အမျိုးသား Chengchi တက္ကသိုလ် က သုတေသီ Raviprasad Narayanan ကတော့ အခြေအနေတွေဟာ တရုတ်နိုင်ငံအတွက် ဝင်မပါလို့ မဖြစ်တဲ့ အခြေအနေမျိုး ဖြစ်လာနေတာလို့ သုံးသပ်ပါတယ်။
“အခုကတော့ တရုတ်နယ်စပ်မှာ ဒုက္ခသည်ပြဿနာ ကြုံနေရတာပါ။ ဒီအကျပ်အတည်းကြောင့် ပြည်နယ်အဆင့်က ခေါင်းဆောင်တွေလောက် သာမကပါဘူး၊ ဘေဂျင်းက လူတွေအတွက်ပါ ကသိကအောက် ဖြစ်စရာ အများအပြား ဖန်တီးပေးခဲ့တာလည်း ဖြစ်ပါတယ်။ ဒါကြောင့်လည်း အငိုက်မိတဲ့ ဒီလိုအခြေအနေမျိုးမှာ ဘေးထွက်နေလို့ မဖြစ်ဘူးလို့ သူတို့ အနေနဲ့ ခံစားလာကြတာပါ။”
တကယ်တော့ လက်နက်ကိုင် တိုက်ပွဲတွေဟာ ငြိမ်းချမ်းရေးကိုသာ ခြိမ်းခြောက်နေတာ မဟုတ်ဘဲ ဒ်ါလာသန်းပေါင်း ထောင်ချီ တန်ဘိုးရှိတဲ့ တရုတ်နိုင်ငံရဲ့ ကုန်သွယ်မှုနဲ့ ရင်းနှီးမြုပ်နှံမှုတွေကိုပါ ထိခိုက်နေရတာပါ။ တရုတ်နိုင်ငံကို အများစု တင်ပို့မယ့် ရေအား ကချင်ပြည်နယ်တွင်းက လျှပ်စစ်ထုတ်လုပ်ရေး စီမံကိန်းတွေမှာ တရုတ်နိုင်ငံက ပါဝင်ပတ်သက်နေတာလည်း ဖြစ်ပါတယ်။ ဒါကြောင့်လည်း ငြိမ်းချမ်းရေးအတွက် ဆွေးနွေးဖို့ တရုတ်နိုင်ငံက ကမကထလုပ်နေတာဟာ စီးပွားရေး အမြင်နဲ့ ဖြစ်တယ်လို့ တရုတ်-မြန်မာ နယ်စပ် အခြေစိုက် မြန်မာ့အရေး အကဲခတ်တဦးဖြစ်တဲ့ ဦးအောင်ကျော်ဇောကတော့ မြင်ပါတယ်။
“မြောက်ပိုင်း ကချင်ပြည်နယ်ထဲမှာ အထူးသဖြင့် KIA ထိန်းချုပ်ထားတဲ့ ဒေသထဲမှာ တရုတ်အစိုးရရဲ့ ရင်းနှီးမြုပ်နှံမှုတွေ၊ ငွေကုန်ကြေးကျ ရင်းနှီးထားတဲ့ စီမံချက်တွေ အများကြီး ရှိပါတယ်။ ဒါကြောင့် ငြိမ်းချမ်းရေးရဖို့ လိုပါတယ်။”
စီးပွားရေးအရ အချက်အခြာကျတဲ့ ကိစ္စအဖြစ်နဲ့ တရုတ်-မြန်မာ ၂ နိုင်ငံကြား ရေနံနဲ့ သဘာဝဓာတ်ငွေ့ ပိုက်လိုင်း စီမံကိန်း ဟာလည်း ဒီဒေသတွင်းမှာပဲ ရှိနေတာလို့ ဆန်းစစ်သူတွေက ထောက်ပြကြပါတယ်။ ဒီပိုက်လိုင်း ၂ ခုကနေ မြန်မာနိုင်ငံ အနောက်ဘက်ခြမ်းကနေ ပဋိပက္ခဖြစ်ပွားရာနေရာနဲ့ မနီးမဝေး ကချင်ပြည်နယ် တောင်ပိုင်းမှာရှိတဲ့ တရုတ်နိုင်ငံ ရွှေလီမြို့အထိ ရေနံနဲ့ဓာတ်ငွေ့တွေကို တင်ပို့သွားမှာပါ။
ဒီလိုပဲ တရုတ်နိုင်ငံဟာ မြန်မာနိုင်ငံကနေ တွင်းထွက်တွေ၊ အဖိုးတန်ကျောက်မျက်တွေ၊ သစ်တွေကို နယ်စပ်ကတဆင့် တရားဝင်ရော၊ တရားမဝင်ရော ဝယ်ယူတာတွေ ရှိပါတယ်။ အပြန်အလှန်အနေနဲ့ကတော့ ဈေးပေါတဲ့ တရုတ်ကုန်တွေကို တင်သွင်းနေတာ ဖြစ်ပါတယ်။ စစ်လက်နက်တွေကိုလည်း အစိုးရသာမက လက်နက်ကိုင် အဖွဲ့တွေကိုပါ ရောင်းချနေတာပါ။ ဒါပေမဲ့လည်း အခုအခါ မြန်မာနိုင်ငံ စီးပွားရေး လွတ်လပ်ပွင့်လင်းလာတာနဲ့အမျှ တရုတ်နိုင်ငံဟာ အစိုးရနဲ့ ဆက်ဆံရေးကို ပိုပြီး အာရုံစိုက်လာတယ်လို့ ဗြိတိန်နိုင်ငံ လန်ဒန်စီးပွားရေး တက္ကသိုလ်က သုတေသီ ဒေါက်တာဇာနည်က ပြောပါတယ်။
“သူ့အကျိုးစီးပွားနဲ့ ကိုက်တဲ့အခါ တရုတ်နိုင်ငံက ဒေသခံတိုင်းရင်းသား လက်နက်ကိုင် အုပ်စုတွေအပေါ် ဖိအားပေးလာပါလိမ့်မယ်၊ အထူးသဖြင့်ကတော့ ဝ တပ်ဖွဲ့နဲ့ ကခင်ျလည်း ပါပါလိမ့်မယ်။ ဒါပေမဲ့လည်း သူတို့ရဲ့ လုပ်ရပ်တွေဟာ ဘယ်လောက်အထိ အပြုသဘောဆောင်သလဲ၊ မြန်မာလူမျိုးတွေ အကျိုးစီးပွားအတွက် ဘယ်လောက်ပါမလဲ ဆိုတာတော့ ကျနော် မပြောနိုင်ပါဘူး။ ဘာကြောင့်လဲဆိုတော့ အခုအခြေအနေမှာ တရုတ်နိုင်ငံဟာ နယ်စပ်မှာရှိတဲ့ ဒေသခံ တိုင်းရင်းသား အုပ်စုတွေထက်စာရင် နေပြည်တော်မှာ အကောင်ကြီးကြီးမိအောင် ဖမ်းနေလို့ပါ။”
လက်နက်ကိုင် တိုက်ပွဲတွေ အဆုံးသတ်ဖို့ ကိစ္စဟာ မြန်မာအစိုးရအပေါ် စီးပွားရေး ပိတ်ဆို့ ဒဏ်ခတ်မှုတွေ နှစ်ပေါင်းများစွာ ကျင့်သုံးခဲ့ရာက မကြာသေးခင်ကစလို့ ဆက်ဆံရေးတွေ တိုးမြှင့်ဖို့ ကြိုးပမ်းလာတဲ့ အနောက်အင်အားကြီး နိုင်ငံတွေရဲ့ အဓိက တောင်းဆိုချက် တခုလည်း ဖြစ်ပါတယ်။ အခုအထိ အစိုးရက အပစ်အခတ် ရပ်စဲရေး ရယူနိုင်ခဲ့တဲ့ အထဲမှာတော့ ဝ၊ ကရင်နီ၊ ရှမ်း၊ ချင်း စတဲ့ အဖွဲ့အစည်းတွေ ပါဝင်ကြသလို၊ အဓိက တိုင်းရင်းသား လက်နက်ကိုင် အဖွဲ့တခုဖြစ်တဲ့ ကရင်အမျိုးအသား အစည်းအရုံး KNU နဲ့လည်း ငြိမ်းချမ်းရေးအတွက် ဆွေးနွေးသွားဖို့ မကြာသေးခင်ကပဲ သဘောတူညီချက် ရယူနိုင်ခဲ့တာ ဖြစ်ပါတယ်။

ပဒိုမန်းငြိမ်းမောင်ကို အစိုးရက ထပ်မံ တရားစွဲ ရုံးထုတ်

2012-02-10T08:53:00.000+11:00

Thursday, 9 February 2012

ဖေဖော်ဝါရီလ ၉ရက်၊ ၂၀၁၂။ စောခါးစူးညား (ကေအိုင်စီ)

အင်းစိန်ထောင်တွင် ထိန်းသိမ်းခံနေရသည့် ကရင်အမျိုးသား အစည်းအရုံး-KNU ဗဟိုကော်မတီ ခေါင်းဆောင် တဦးဖြစ်သူ ပဒို မန်းငြိမ်းမောင်ကို ထပ်မံ တရားစွဲဆိုရန် မြန်မာအစိုးရက ယနေ့မနက် ၁၁နာရီခွဲမှ ၁နာရီအထိ အင်းစိန်တရားရုံးတွင် ရုံးထုတ် စစ်ဆေးခဲ့သည်။

မြန်မာအစိုးရက ပဒိုမန်းငြိမ်းမောင်အား နိုင်ငံတော်ကို စစ်မက်ပြိုင်ဆိုင်တိုက်ခိုက်မှု ပုဒ်မ-၁၂၂(၁)နှင့် မတရား အသင်း ပုဒ်မ-၁၇တို့ဖြင့် စွဲချက်တင်ထားပြီးနောက်ပိုင်း ယခုလို တရားရုံးထုတ် စစ်ဆေးခဲ့ခြင်းဖြစ်သည်ဟု သူ၏အမှုကို လိုက်ပါဆောင်ရွက် ပေးနေသူ ရှေ့နေဦးကြီးမြင့်က ပြောသည်။
“အစိုးရက KNU နဲ့ လက်မှတ်ထိုးတဲ့အထိ ကူညီရင် တရားမစွဲတော့ဘူးလို့ သူ့ကို ပြောဆိုပြီးမှ အခုလို ရုံးတင်လိုက်တဲ့ကိစ္စဟာ မဖြစ်သင့်ဘူး”ဟု ပဒိုမန်းငြိမ်းမောင်က ပြောကြောင်း ၎င်းအတွက် ရှေ့နေလိုက်ပေး နေသူ ဦးကြီးမြင့်က ကေအိုင်စီသို့ ပြန် လည် ပြောဆိုသည်။
ပြီးခဲ့သည့်လ ဇန်န၀ါရီ ၁၂ရက်နေ့၌ မြန်မာအစိုးရသည် KNU ငြိမ်းချမ်းဖော်ဆောင်ရေးအဖွဲ့နှင့် ပဏာမ ပစ်ခတ် ရပ်ဆိုင်းရေး သဘောတူညီမှု လက်မှတ်ထိုးပြီးနောက် ပဒိုမန်းငြိမ်းမောင်အား ငြိမ်းချမ်းရေးလက်ဆောင်အဖြစ် လွှတ်ပေးမည်ဟု ကတိပေး ပြီးဖြစ်သော်လည်း မလွှတ်ပေးသေးသည့်အပြင် တရားရုံးထုတ် စွဲချက်တင်သည်အထိ ဖြစ်လာခဲ့ခြင်းလည်း ဖြစ်သည်။
အစိုးရက ပဒိုမန်းငြိမ်းမောင်အား ပုဒ်မ နှစ်ခုတပ်သော်လည်း တပြိုင်နက်တည်းပေါင်း၍ စွဲချက်မတင်ဘဲ တခုချင်းစီ စွဲချက်တင် ခဲ့သည်ဟု ရှေ့နေဦးကြီးမြင့်က ယခုလို ဝေဖန်ပြောဆိုသည်။
“ပုဒ်မ ၁၂၂ (၁)နဲ့ ပုဒ်မ ၁၇(၁) တပ်ပြီး သူ့ကို တခုစီ စွဲချက်တင်တယ်။ ပြစ်မှုဖြစ်ရင် တမှုစီ မစွဲသင့်ဘူး။ ပေါင်းပြီး စွဲရမယ်။ ဘာ ဖြစ်လို့လဲဆိုရင် လူသတ်မှုတခုဖြစ်တယ် ဆိုရင် ဓါးက တမှု၊ စွဲတာက တမှု၊ ရန်ဖြစ်တာက တမှုဆိုပြီးတော့ စွဲလို့မရဘူး။ ဥပဒေ အရလည်းပဲ ဖြစ်တဲ့အမှု တခုဆိုရင် တခုပဲ စွဲဆိုရမယ်လို့ ပြဌာန်းထားတယ်။”ဟု သူက ပြောသည်။
ထို့အပြင် ပုဒ်မ ၁၂၂ (၁) သည် သေဒဏ်မှ တစ်သက်တစ်ကျွန်းအထိ ချမှတ်နိုင်ပြီး ပုဒ်မ ၁၇(၁) သည် ထောင်ဒဏ် ၂နှစ်မှ ၃နှစ်အထိ ချမှတ်နိုင်ကြောင်း သိရသည်။
လာမည့် ဖေဖော်ဝါရီ ၁၃ရက်(တနင်္လာနေ့)တွင် ပဒိုမန်းငြိမ်းမောင်အား ထပ်မံ ရုံးထုတ်မည်ဖြစ်ပြီး ယခုလကုန်တွင် စီရင်ချက် ချမှတ်နိုင်ကြောင်းကို ရှေ့နေကြီးမြင့်က “ရုံးတင်တာကတော့ ၃ကြိမ်လောက်ပဲ စစ်ပြီးတော့ လျှောက်လဲချက်လာမယ်။ ပြီးရင် အမိန့်ချမှာပဲ။ ကျနော်အဲလိုပဲ ထင်တယ်။”ဟု ပြောသည်။
ပဒိုမန်းငြိမ်းမောင်အား စွဲချက်တင်ရာတွင် တရားသူကြီး ဦးလှဝင်းက ကြားနာစစ်ဆေးပြီး တရားလို သက်သေ နှစ်ဦး အပါအ၀င် သက်သေ ၆ဦးရှိကာ သက်သေအားလုံးမှာ ရဲဝန်ထမ်းများဖြစ်သည်ဟု သိရသည်။
၂၀၁၀ခုနှစ်၊ ဇူလိုင်လ ၂၄ရက်နေ့က မဟာမိတ်အဖွဲ့အချို့နှင့် သွားရောက်တွေ့ဆုံရန် ပဒိုမန်းငြိမ်းမောင်သည် ထိုင်းနိုင်ငံမှတ ဆင့် တရုတ်နိုင်ငံသို့ သွားရောက်ခဲ့သည့် ခရီးစဉ်တွင် မြန်မာနိုင်ငံသို့ ပြန်လည် ပို့ဆောင်ခံရကာ တရားမ၀င် နယ်စပ်ဖြတ်ကျော် မှု၊ တရားမ၀င် စာရွက်စာတမ်း ကိုင်ဆောင်မှု၊ မတရားအသင်းအက်ဥပဒေ ပုဒ်မ စသည်ဖြင့် အင်းစိန်ထောင်တွင် ထောင်ဒဏ် ၁၇နှစ် အကျဉ်းကျခံနေရခြင်း ဖြစ်သည်။
၎င်းသည် ကရင်အမျိုးသားအစည်းအရုံး(KNU)တွင် ဗဟိုကော်မတီဝင်တဦးဖြစ်သည့်အပြင် တိုင်းရင်းသား လက်နက်ကိုင်အဖွဲ့ (၁၂)ဖွဲ့ဖြင့် ပူးပေါင်းဖွဲ့စည်းထားသည့် ညီညွှတ်သော တိုင်းရင်းသားလူမျိုးများ ဖက်ဒရယ် ကောင်စီ(UNFC)တွင် ကော်မတီဝင် တစ်ဦးလည်း ဖြစ်သည်။

ဒေါ်အောင်ဆန်းစုကြည်သို့ အကြံပြုစာ။ စောအယ်ယား (မယ်လဒုက္ခသည်စခန်း)

2012-02-10T08:51:00.002+11:00

Wednesday, 8 February 2012

သို့
KIC
ဒေါ်အောင်ဆန်းစုကြည်သို့ အကြံပြုစာ။
NLD ခေါင်းဆောင် ဒေါ်အောင်ဆန်းစုကြည်သည် ကြားဖြတ် ရွေးကောက်ပွဲဝင်ရန်အတွက် ကွမ်းခြံကုန်းမြို့နယ်အတွင်းရှိ ကျေးရွာတစ်ရွာမှ ကရင်မိသားစုဝင်တစ်ဦးအဖြစ် စာရင်းသွင်းထားသည်ဟု သိရပါသည်။ တိုင်းရင်းသားများ၏ ကောင်းကျိုးကို ဆောင်ရွက်လိုသောကြောင့် ကရင်တိုင်းရင်းသား မိသားစုဝင်တစ်ဦးအဖြစ် စာရင်းသွင်းခြင်းဟု မှတ်ထင်ပါသည်။ ကရင်တိုင်းရင်းသားများ၏ လိုအပ်ချက်၊ ခံစားချက်၊ နစ်နာချက်များကို အသေးစိတ် သိရှိမှသာလျှင် ၎င်းတို့၏ အကျိုးကို မည်ကဲ့သို့ စီမံဆောင်ရွက်ပေးရမည်ကို သိရှိနိုင်မည်ဟု ထင်မှတ်ပါသည်။

မြန်မာ့တပ်မတော်မှ လူ့အခွင့်ရေးချိုးဖေါက်မှုကို ခံစားရသော ကရင်တိုင်းရင်းသူအချို့၏ မှတ် တမ်းမှတ်ရာများကို ဖတ်ရှုခြင်းဖြင့် ဒေါ်အောင်ဆန်းစုကြည်၏ စီမံဆောင်ရွက်ချက်များအား အနည်းငယ် အထောက်အကူပြုမည်ဟု ထင်မှတ်ပါသည်။
အထူးသဖြင့် ကရင်အမျိုးသမီးအစည်းအရုံးနှင့် အခြားလူမျိုးစုများမှ ပြုစုရေးသားထားသော မှတ်တမ်းစာအုပ်များကို ဖတ်ရှုလေ့လာစေလိုကြောင်းကို KIC မှတဆင့် အကြံပြုပေးလိုက်ပါသည်။
စောအယ်ယား (မယ်လဒုက္ခသည်စခန်း)

ထိုင်းကာကွယ်ရေးဦးစီးချုပ် ထိုင်း-မြန်မာနယ်နိမိတ်ကို လာရောက်စစ်ဆေး

2012-02-08T23:08:00.000+11:00

Tuesday, 7 February 2012

ဖေဖေါ်ဝါရီ ၇ရက်၊ ၂၀၁၂ခုနှစ်။ ရွှေသိုက်တော (ကေအိုင်စီ)

မြန်မာနိုင်ငံဘက်မှ မြန်မာစစ်တပ်နှင့် ကရင်လက်နက်ကိုင် တပ်ဖွဲ့များ အခြေစိုက်သည့် ထိုင်း-မြန်မာနယ်စပ် ထိုင်းဘက်ခြမ်း တာ့ခ်ခရိုင် အတွင်းရှိ မဲဆောက်နှင့် ဖုတ်ဖရမြို့နယ် နယ်နိမိတ်တစ်လျှောက်ကို ထိုင်းတပ်မတော် ကာကွယ်ရေးဦးစီးချုပ် ဗိုလ်ချုပ်ကြီး ထနာ ဆတ်ပါတီမာပရကွန် ယနေ့ လာရောက်စစ်ဆေး ခဲ့သည်။

ထိုင်းကာကွယ်ရေးဦးစီးချုပ်က ၎င်း၏ခရီးစဉ်နှင့် ပတ်သက်၍ သတင်းထောက်များကို တစုံ တရာ ပြောဆိုခြင်း မရှိခဲ့ပေ။
သို့သော် ထိုင်းကာကွယ်ရေးဦးစီးချုပ်၏ ခရီးစဉ်တွင်ပါရှိသည့် တာ့ခ်ခရိုင်နှင့် မယ်ဟောင် ဆောင်ခရိုင် နှစ်ခု၏ တာဝန်ခံ “နရေစွမ်”တပ်မမှူးဗိုလ်ချုပ် ကစေထနာဖွန်က ထိုင်းနှင့် မြန်မာချစ်ကြည်ရေးအတွက် လာရောက်သည့်ခရီးစဉ်ဖြစ်သည်ဟု ပြောသည်။
၎င်းက “မြန်မာနိုင်ငံမှာ အမျိုးသားပြန်လည်သင့်မြတ်ရေးတွေလုပ်နေတယ်။ နယ်စပ်ဒေသ တလျှောက်မှာလည်း တည်ငြိမ်အေးချမ်းမှုရှိဘို့ လိုတယ်။ ထိုင်းနဲ့မြန်မာကြားမှာ ချစ်ကြည် ရေး ပိုမို ခိုင်မြဲအောင်ဆောင်ရွက်ကြရမယ်။ နှစ်ဖက်နယ်စပ်အကြားမှာ နားလည်မှုလွဲခဲ့တာ တွေရှိရင် ပြေလည်အောင်ဖြေရှင်းကြဘို့ အောက်ခြေတပ်မှူးတွေကိုမှာကြားသွားတယ်။”ဟု သတင်းထောက်များကို ပြောသည်။
ခရီးစဉ်တွင် ထိုင်းကာကွယ်ရေးဦးစီးချုပ်နှင့်အဖွဲ့သည် ဖုတ်ဖရမြို့နယ်အတွင်း နယ်စပ် မြန်မာဘက်ခြမ်းရှိ မြန်မာစစ်တပ်စခန်းထိုင်သည့် ဝေါ်လေရွာနှင့် တိုးတက်သော ဗုဒ္ဓဘာ သာ ကရင်အမျိုးသားတပ်မတော်-DKBA ကလို့ထူးဘောအဖွဲ့ စခန်းထိုင်သည့် သေ့ဘော ဘိုးရွာနှင့် ကရင်အမျိုးသားလွတ်မြောက်ရေးတပ်မတော် KNLA စခန်းထိုင်သည့် မြန်မာ ဘက်ခြမ်းနေရာများ၏ အခြေအနေများကို သွားရောက်ကြည့်ရှု စစ်ဆေးခဲ့သည်။

ဆက်လက်၍ မဲဆောက်ရှိ ထိုင်းစစ်တပ်သို့ သွားရောက် စစ်ဆေးပြီးနောက် ထိုင်း-မြန်မာ ချစ်ကြည်ရေးတံတားနှင့် နယ်စပ်အခြေအနေများကို လေ့လာကာ ထိုင်းကာကွယ်ရေးဦးစီး ချုပ်နှင့် အဖွဲ့သည် မွန်းလွဲပိုင်းတွင် ဘန်ကောက်သို့ ပြန်လည်ထွက်ခွာသွားသည်။
ထိုင်းနှင့် မြန်မာနှစ်ဖက်တပ်မတော်များအကြား ချစ်ကြည်ရေးပိုမိုခိုင်မြဲစေရေးအတွက် မြန်မာ့တပ်မတော် ကာကွယ်ရေးဦးစီးချုပ် ဗိုလ်ချုပ်ကြီးမင်းအောင်လှိုင် ဦးဆောင်သည့် ချစ်ကြည်ရေးကိုယ်စားလှယ်အဖွဲ့သည် ယခင်လက ထိုင်းနိုင်ငံသို့ ချစ်ကြည်ရေးခရီးစဉ် သွားရောက်ခဲ့သည့်နောက်ပိုင်း ထိုင်းတပ်မတော်ကာကွယ်ရေးဦးစီးချုပ်၏ ထိုင်း-မြန်မာ နယ်စပ်ခရီး စတင်ခြင်း ဖြစ်သည်။

ရိက္ခာပို့၊ တပ်အင်အားတိုးလာသည့် အစိုးရတပ်များ မိုင်းထိမှန်၍ သေဆုံးဒဏ်ရာရ

2012-02-08T23:06:00.002+11:00

Tuesday, 7 February 2012

ဖေဖော်ဝါရီလ ၂ရက်၊ ၂၀၁၂။ စောခါးစူးညား (ကေအိုင်စီ)

ကရင်ပြည်နယ် သံတောင်မြို့နယ်၊ ဘောဂလိဒေသ၌ ယခုရက်ပိုင်းအတွင်း ရိက္ခာပို့ဆောင်ပြီး တပ်အင်အား တိုးချဲ့လာသည့် မြန် မာအစိုးရတပ်များသည် ကရင်အမျိုးသားအစည်းအရုံး-KNU လက်အောက်ခံတပ်များ၏ မြေမြုပ်မိုင်းထိ၍ ၆ဦး သေဆုံးပြီး ၇ဦး ဒဏ် ရာရရှိခဲ့သည်ဟု သိရသည်။

ယခင်လ ဇန်န၀ါရီ ၂၉ရက်နေ့က ဘောဂလိဒေသတွင် တပ်အင်အားတိုးချဲ့၍ ရိက္ခာပို့နေသော အစိုးရတပ် တပ်မ(၆၆) လက် အောက်ခံ ခလရ(၈၀)တပ်ရင်းသည် KNU လက်အောက်ခံ ကရင်အမျိုးသားလွတ်မြောက်ရေး တပ်မတော်-KNLA ၏ မိုင်းနှင့် ထိမှန်ခဲ့ခြင်းဖြစ်ကြောင်း KNU တောင်ငူခရိုင်၊ တပ်မဟာ(၂)မှ စစ်ဖက်ဆိုင်ရာ သတင်းအရ သိရသည်။
KNU တွဲဖက်အတွင်းရေးမှူး(၁) ဗိုလ်မှူးစောလှငွေက “ငြိမ်းချမ်းရေး တည်ဆောက်နေတဲ့ကာလမှာ ပြဿနာ မဖြစ်အောင် နှစ်ဦးနှစ် ဖက် ထိန်းသိမ်းတာပဲ။ ဒါပေမယ့် အဲဒီဒေသက မိုင်းဟောင်းတွေ ရှင်းလင်းရသေးတာ မဟုတ်ဘူး။ သူတို့ကိုလည်း သွားလာတာလုပ် ရင် လမ်းမကြီးအတိုင်းပဲ သွားဖို့ပြောထားတယ်။ လမ်းမကြီးအတိုင်း မသွားတော့ မိုင်းထိတာပေါ့။”ဟု ပြောဆိုသည်။
မိုင်းထိ၍ သေဆုံးသွားသည့် မြန်မာစစ်တပ်များထဲတွင် ခလရ(၈၀) တပ်ရင်းမှူး ဒုဗိုလ်မှူးကြီး မျိုးမင်းသန့်လည်း ပါဝင်သည်ဟု KNU ဘက်က ပြောသည်။
မြန်မာအစိုးရသည် KNU နှင့် ပြည်နယ်အဆင့် ပဏာမ အပစ်အခတ် ရပ်ဆိုင်းရေး သဘောတူညီမှု ရရှိခဲ့သော်လည်း KNU ထိန်း ချုပ်နယ်မြေများအတွင်း တပ်အင်အားများ တိုးချဲ့လာသကဲ့သို့ ရိက္ခာများ ပိုမို ပို့ဆောင်လာစဉ် ယခုလို မြေမြုပ်မိုင်း ထိမှန်ခဲ့ခြင်း ဖြစ်သည်။
ဘောဂလိရွာသား ကရင်အမျိုးသားတစ်ဦးက “ဗမာစစ်တပ်က လမ်းမပေါ်ကနေ မသွားဘဲ ရွာထဲ၊ တောထဲတွေက လိုက်သွားတော့ ကျနော်တို့ရွာသားတွေလည်း ခြံထဲမသွားရဲ၊ အပြင်မထွက်ရဲဘဲ ကြောက်နေကြတယ်လေ။”ဟု ဖေဖော်ဝါရီလ ၄ရက်နေ့က ကေအိုင် စီသို့ ပြောသည်။
ထို့အပြင် အင်အားတိုးချဲ့နေသည့် အစိုးရတပ်သည် တောင်ငူမှတဆင့် ဘောဂလိဒေသကို ဖြတ်ကာ ၎င်းတို့ တပ်စခန်းရှိရာ ဘူဆာ ခီးသို့ ရိက္ခာပို့ဆောင်ရန် ထိုဒေသရှိ ဘောဂလိရွာသားများကို လုပ်အားပေး ခေါ်ယူခိုင်းစေလျှက်ရှိသည်ဟုလည်း ဒေသခံများက ပြောသည်။
မြန်မာအစိုးရနှင့် KNU တို့ ဇန်န၀ါရီလ ၁၂ရက်နေ့က ပဏာမ အပစ်အခတ် ရပ်ဆိုင်းရေး သဘောတူ လက်မှတ်ရေးထိုးမှုနောက် ပိုင်းမှ ယခုအချိန်ထိ KNU ထိန်းချုပ်နယ်မြေများဖြစ်သည့် တပ်မဟာ(၁)၊ (၂)၊ (၃)၊ (၅)နှင့် (၆)တို့တွင် မြန်မာစစ်တပ်ဘက်မှ ရိက္ခာ နှင့် တပ်အင်အားများကို တိုးချဲ့လျှက်ရှိသည်။

ကြံသကာ ဈေးမကောင်း၍ ဒုံသမိချောင်းနံဘေး ကြံခင်းစိုက်ပျိုးသူ နည်းလာ

2012-02-04T22:55:00.000+11:00

ဖေဖော်ဝါရီ ၃ရက်၊ ၂၀၁၂ခုနှစ်။ စောခါးစူးညား (ကေအိုင်စီ)

ကြံသကာ ဈေးမကောင်း၍ ကရင်ပြည်နယ်နှင့် မွန်ပြည်နယ်ကို နယ်မြေ ပိုင်းခြားထားသည့် ဒုံသမိချောင်းနံဘေးတွင် ယခင်က ထက်စာလျှင် ကြံစိုက်ပျိုးသူများ နည်းပါးလာသကဲ့သို့ စိုက်ပျိုးသည့်မြေဧကမှာလည်း လျော့နည်းလာသည်။

ဒုံသမိချောင်း အနောက်ဘက်ခြမ်း မွန်ပြည်နယ်၊ ဘီးလင်းမြို့နယ် မြစ်ကျိုးကျေးရွာမှ ကြံစိုက်ပျိုးသူ စောကျော်က “အရင်က ဒုံသမိချောင်နံဘေးမှာ ကျနော်တို့ ကြံစိုက်တာ လေးငါးဧကတောင် စိုက်တာ။ ကြံသကာဈေးမရှိတော့ တစ်ဧက နှစ်ဧက လောက်ပဲ စိုက်တယ်။ အခြားသူလည်း မစိုက်တော့သလောက်ပဲ။”ဟု ပြောသည်။

ပြီးခဲ့သည့် ၂၀၁၁ခုနှစ်က ကြံသကာ တပိဿာလျှင် ကျပ်ငွေ ၆၀၀ ရှိခဲ့ရာမှ ယခုနှစ် ကြံသကာတပိဿာ၏ ဈေးနှုန်းမှာ ၄၅၀ ကျပ်မှ ၅၀၀ကျပ်အထိသာ ရှိသည်ဟု ကြံစိုက်ခင်းပိုင်ရှင် ဒေသခံများ၏ ပြောပြချက်အရ သိရသည်။

ကြသောင်းဆိပ်၊ ပျဉ်းမပင်ဆိပ်၊ တဂေးလောင်း၊ ကြိုးဝိုင်း၊ မြစ်ကျိုး၊ မင်းဇော၊ လေးကေနှင့် နေမင်းအောင် စသည့် ကျေးရွာများ မှာ ဒုံသမိချောင်း၏ အရှေ့နှင့် အနောက်ဘက်ခြမ်းရှိ ကြံခင်းစိုက်ပျိုးသည့် ကျေးရွာများ ဖြစ်ကြပြီး ကြံရည်မှထွက်ရှိသည့် ကြံသ ကာများကို ရောင်းဝယ်ခြင်း၊ အရက်ချက်လုပ်ခြင်းနှင့် မုန့်လုပ်ရာတွင် အသုံးပြုကြသည်။

ပုံမှန်အားဖြင့် ဒုံသမိချောင်းနံဘေးဒေသမှ ကျေးရွာများရှိ ရွာတရွာလျှင် ကြံစိုက်ခင်း ၁၀ခင်းကျော်အထိ ရှိသော်လည်း ယခုနှစ် တွင်မူ ကြံစိုက်ခင်း ၅ခင်းအထိသာ ရှိကြောင်းနှင့် စိုက်ပျိုးသည့် ကြံခင်းများမှာ ၁ဧကမှ ၅ဧကအထိ ရှိကြောင်း သိရသည်။

“ကြံသကာ ဈေးမရှိတော့ ကြံစိုက်တဲ့သူလည်း နည်းလာတယ်။ ဒီနှစ် မင်းဇောရွက ကြံစိုက်တဲ့သူ လေး၊ ငါးခင်းပဲ ရှိတယ်။”ဟု ဒုံသမိချောင်း အရှေ့ဘက်ခြမ်း ကရင်ပြည်နယ်၊ ဖားအံမြို့နယ် မင်းဇောကျေးရွာမှ ကျော်ကဲ့ပါးက ကေအိုင်စီသို့ ပြောသည်။

၎င်း မင်းဇောရွာ၊ မြစ်ကျိုးရွာမှ ကားဖြင့် ၅နာရီကျော် ခရီးသွားရသည့် ကျိုက္ကော်မြို့လေးသို့ ကြံသကာ သွားရောင်းပါက တပိ ဿာ ၄၂၀ကျပ် ဈေးနှုန်းထား၌သာ အ၀ယ်ဒိုင်များက ဈေးပေးသဖြင့် လမ်းစရိတ်၊ ရင်းနှီးငွေများနှင့် တွက်ချေမကိုက်သည့် အပေါ် သွားရောက်ရောင်းချသူ မရှိတော့ကြောင်းလည်း သူက ဆက်လက် ရှင်းပြသည်။

ထိုဒေသရှိ ကြံပင်များကို ကြံကြိတ်စက်ဖြင့် အရည်အဖြစ် ကြိတ်ယူပြီး ထိုမှတဆင့် ကြံရည်ကို ကြံသကာအဖြစ် ပြန်လည် ချက် လုပ်ကြသည်။ ကြံစိုက်ပျိုးခြင်းကို နှစ်စဉ် ကြံကြိတ်ပြီးသည်နှင့်တပြိုင်နက် စိုက်ပျိုးကြခြင်းဖြစ်ပြီး အောက်တိုဘာ၊ နိုဝင်ဘာနှင့် ဒီဇင်ဘာလတို့သည် ကြံကြိတ်သည့်လ ဖြစ်သည်။

ဒုံသမိချောင်းနံဘေးရှိ ကြံခင်းစိုက်ပျိုးမှုမှာ ပြီးခဲ့သည့် ၂၀၀၈ခုနှစ် နာဂစ်မုန်တိုင်း တိုက်ခိုက်ပြီးနောက်ပိုင်းမှစ၍ နည်းလာခြင်း ဖြစ်သည်။ ထိုနှစ်က ရေလွှမ်းမိုး၍ ကြံပင်သန်မာမှုမရှိသလို ကြံသကာဈေးနှုန်းလည်း မကောင်းသည့်အတွက် အချို့ကြံခင်းပိုင် ရှင်များက ၎င်းတို့ကြံခင်းများကို မီးရှို့ဖျက်ဆီးခဲ့ကြသည်။

ဒုံသမိချောင်းကမ်းနံဘေး ကြံပင်များမှ ထွက်ရှိသည့် ကြံသကာများအနက် ကြသောင်းဆိပ်ရွာနှင့် ပျဉ်းမပင်ဆိပ်ရွာထွက် ကြံသကာသည် အရည်အသွေးအကောင်းဆုံးဖြစ်သည်။

ထိုင်းနိုင်ငံခြားရေးဝန်ကြီး ကရင်ပြည်နယ်ဝန်ကြီးချုပ်နှင့် သွားရောက်တွေ့ဆုံ

2012-02-04T22:54:00.000+11:00

ဖေဖော်ဝါရီ ၃ရက်၊ ၂၀၁၂ခုနှစ်။ ရွှေသိုက်တော (ကေအိုင်စီ)

ထိုင်းနှင့် မြန်မာ နှစ်နိုင်ငံ ချစ်ကြည်ရေးတိုးမြှင့်ရန် ရည်ရွယ်၍ ထိုင်းနိုင်ငံခြားရေးဝန်ကြီး ဦးဆောင်သည့်အဖွဲ့သည် ယနေ့မွန်းလွဲ ပိုင်းက မဲဆောက်မှတဆင့် မြ၀တီမြို့သို့သွားရောက်ကာ ကရင်ပြည်နယ် ၀န်ကြီးချုပ် ဦးဇော်မင်းနှင့်အဖွဲ့ကို တွေ့ဆုံခဲ့သည်။

ထိုင်းဝန်ကြီးချုပ်ဆူလဖုန်းတိုးဝိကျာချိုင်းကွန်းနှင့် အဖွဲ့သည် ကရင်ပြည်နယ်ဝန်ကြီးချုပ် ဦးဇော်မင်းနှင့်အဖွဲ့ကို မြ၀တီမြို့တွင် တွေ့ဆုံ၍ နှစ်နိုင်ငံအကြား မြန်မာအလုပ်သမား ဆိုင်ရာကိစ္စ၊ နယ်စပ်ကုန်သွယ်ရေးဆိုင်ရာကိစ္စရပ်များအပြင် နှစ်နိုင်ငံ ချစ်ကြည်ရေး တိုးမြှင့်ခြင်းများအတွက် သွားရောက်ခဲ့ခြင်းဖြစ်သည်ဟု ထိုင်းနိုင်ငံခြားရေးဝန်ကြီးက သတင်းထောက်များကို ပြောသည်။

၎င်းက “အခုသွားတာ နှစ်နိုင်ငံ ချစ်ကြည်ရေးကိစ္စ အပါအ၀င် မြန်မာဘက်က နယ်စပ်ကုန်သွယ်ရေး ပြန်ဖွင့်လိုက်တဲ့အတွက် ကျေးဇူးတင်ကြောင်း သွားပြောဘို့နဲ့ ဘုရားသွားဖူးတာ ဖြစ်တယ်။”ဟု ပြောသည်။

ထိုင်းနိုင်ငံခြားရေးဝန်ကြီးနှင့် အဖွဲ့သည် မြ၀တီမှအပြန်၌ နှစ်နိုင်ငံအကြား အငြင်းပွားဖွယ်ရာ နယ်ခြားသောင်ရင်းမြစ် ထိုင်းဘက် ခြမ်းတွင် မြန်မာဘက်ခြမ်းမှ မြန်မာအလံလွှင့်ထူထားသည့် မဲဆောက်မြို့နယ်အပိုင်ရှိ မဟာဝမ်ကျေးရွာ(မဲ့ကိုကင်း)သို့ သွား ရောက်ကြည့်ရှု စစ်ဆေးခဲ့သည်။

အဆိုပါနေရာတွင် ယခင်လကစ၍ မြန်မာဘက်က ထိုင်းဘက်ခြမ်းအတွင်းသို့ မီတာ ၅၀ခန့် ၀င်ရောက်၍ မြန်မာအလံ လွှင့်ထူခဲ့ ပြီး မြန်မာပိုင်နက်ဟု ပြောကြားခဲ့ကာ ထိုင်းဘက်ကလည်း ၎င်းတို့ပိုင်နက်အတွင်း ၀င်ရောက်အလံလွှင့်ထူခဲ့ပြီး သူပိုင်ကိုယ်ပိုင် အပြန်အလှန် ပြောဆိုခဲ့ကြသည်။

ထိုကိစ္စနှင့် ပတ်သက်၍ ထိုင်းနိုင်ငံခြားရေးဝန်ကြီးက "ဒီကိစ္စ ဘာပြဿနာမှ မရှိပါဘူး။ နှစ်ဖက်နယ်ခြားကော်မတီကနေတဆင့် ဆွေးနွေးညှိနှိုင်းလိုက်မယ်ဆိုရင် အားလုံး ပြေလည်သွားမှာပါ။”ဟု သတင်းထောက်များကို ပြောသည်။

၂၀၁၀ခုနှစ်၊ ဇူလိုင်လက ထိုင်းနိုင်ငံဘက်ခြမ်းရှိ သောင်ရင်းမြစ်ကမ်းပါးတွင် ထိုင်းဘက်မှ ကမ်းထိန်းနံရံ တည်ဆောက်လာခဲ့ သည့်အတွက် နှစ်နိုင်ငံအကြား ဆက်ဆံရေးတင်းမာမှု ဖြစ်ပွားကာ မြန်မာဘက်မှ ချစ်ကြည်ရေးတံတား အပါအ၀င် နှစ်နိုင်ငံ နယ်စပ်ကုန်သွယ်မှု ကို တနှစ်ခွဲနီးပါး ပိတ်ထားခဲ့ပြီးနောက်ပိုင်း လွန်ခဲ့သည့် ၂လခန့်က ပြန်လည်ဖွင့်လှစ်ပေးခဲ့ခြင်းဖြစ်သည်။

လယ်မြေအသိမ်းခံရမည့်အရေး လယ်သမားများ သမ္မတထံ မေတ္တာရပ်ခံစာတင်

2012-02-02T21:57:00.000+11:00

ဖေဖော်ဝါရီလ ၁ရက်။ ၂၀၁၂ ခုနှစ်။ နန်းသူးလေ (ကေအိုင်စီ)

ရှမ်းပြည်နယ်- တောင်ကြီးမြို့ရှိ ကျေးရွာတချို့တွင် ရာနှင့်ချီသည့် လယ်ယာမြေများကို အစိုးရတပ်မှ တပ်မြေကျောက်တိုင်များ လာရောက်စိုက်ထူထားသဖြင့် ဒေသခံများ လယ်ယာမြေ အသိမ်းခံရမည့်အရေး သမ္မတ ဦးသိန်းစိန်ထံ မေတ္တာရပ်ခံစာတင် ထားကြောင်း သိရသည်။

တောင်ကြီးမြို့နယ် နမ့်ဆီ၊ ပင်ငိုကျေးရွာများမှ လယ်ဧက ၆၁၀အား တပ်မြေအဖြစ် ကျောက်တိုင် စိုက်ထူထားခြင်းခံရသည့် လယ်သမား ၁၀၇ဦးနှင့် နောင်လေ၊ ထီဝေါ်၊ ကန်လောင်းနှင့် ထီတယမ်ကျေးရွာများ၏ လယ်မြေဧက ၁၇၀အား အလံနီ စိုက်ထူ ခြင်းခံနေရသည့် လယ်သမား ၄၄ဦး (စုစုပေါင်း၁၅၁ဦး)တို့မှ စုပေါင်းပြီး မေတ္တာရပ်ခံသည့် တောင်းဆိုစာများ တင်ခဲ့ခြင်း ဖြစ် သည်။

ဒေသခံများသည် သမ္မတထံ စာတင်ရန် ရှမ်းပြည်နယ် ဘဏ္ဍာရေးနှင့် အခွန်ဝန်ကြီး ဦးသိန်းမောင်ထံ သွားရောက်တိုင်ပင်မှုများ ရှိခဲ့ပြီး ၎င်း၏ အကြံပြုချက်အရ တောင်ကြီးမြို့နယ် ကြံ့ခိုင်ရေးပါတီမှတဆင့် ဇန်န၀ါရီလ ၃၀ရက်နေ့က သမ္မတထံ စာတင်ခဲ့ သည်ဟု ပအိုဝ့်လယ်သမားအရေး ကူညီဆောင်ရွက်ပေးနေသည့်တောင်ကြီးမြို့ခံ ခွန်ခမ်းကောင်က ပြောသည်။

ထိုဒေသမှ ပြည်သူများသည် တောင်ယာလုပ်ငန်းဖြင့် အဓိက အသက်မွေးဝမ်းကြောင်း ပြုကြသည်။ အစိုးရမှ ၎င်းလယ်မြေများ သိမ်းလိုက်လျှင် ဒေသခံများ၏ ဘ၀ရပ်တည်ရေးမှာ စိုးရိမ်ရကြောင်း ခွန်ခမ်းကောင်က ယခုလို ပြောသည်။

သူက “ဒီနယ်တစ်ဝိုက်က ရွာသူရွာသားတွေက မြေယာလုပ်ငန်းတွေပဲ လုပ်နေရတာ။ အဲဒီမြေတွေကို သိမ်းသွားမယ်ဆိုရင် သူတို့တော့ ငတ်ပြီပဲ။”ဟု ပြောသည်။

တပ်မြေအဖြစ် စိုက်ထူထားခံရသည့် မြေယာများတွင် ဂျုံ၊ ကြက်သွန်ဖြူနှင့် ပဲစင်းငုံတို့ အဓိက စိုက်ပျိုးကြသည်။ ထိုမြေယာများ အသိမ်းခံရလျှင် ဒေသခံများမှာ တခြားဒေသများတွင် ဘိန်းအစားထိုး စိုက်ပျိုးရမည့်အရေးနှင့် ကျဘမ်းအလုပ်များ လုပ်ကိုင် လာရမည်ကို စိုးရိမ်နေကြသည်။

ယခင်က ထိုဒေသများတွင် ပင်းပက်သံမဏိစက်ရုံ အမှတ်(၅)မှ ၀န်ထမ်းအိမ်ယာများ တည်ဆောက်ရန် ဒေသခံများ၏ ဆိုင်ခန်း ငယ်ပေါင်း ၂၀ခန်းနှင့် လူနေအိမ် ၄လုံး ရွှေ့ပြောင်းပေးခဲ့ရသည့်အပြင် လယ်ယာမြေ မတရား သိမ်းဆည်းခံခဲ့ရသည့် အဖြစ်များ လည်း ကြုံခဲ့ဖူးသည်။

ဒေသခံတစ်ဦးက “အရင် အသိမ်းခံရတဲ့ မြေယာတွေအတွက် တချို့ လျော်ကြေးရတယ်။ တချို့ကတော့ မရကြဘူး။ ရရင် လည်း အနည်းအပါးပါပဲ။ ဒီငွေလောက်နဲ့ အဆင်မပြေတာတွေ များတယ်။” ဟု ဆိုသည်။

ယင်းဒေသတွင် လက်ရှိ မြေတစ်ဧကလျှင် အပြင်ပေါက်ဈေးမှာ သိန်း ၃၀ကျပ် ၀န်းကျင်ရှိသည်ဟု သိရသည်။

ပြီးခဲ့သည့် ဒီဇင်ဘာလ ၂၄ရက်နှင့် ဇန်န၀ါရီလ ၆ရက်နေ့တို့တွင် အစိုးရမှ အဆိုပါလယ်မြေများကို အမှတ်အသား လာရောက် စိုက်ထူခဲ့ကြသော်လည်း မည်သည့်ရည်ရွယ်ချက်ဖြင့် စိုက်ထူခြင်းနှင့် လာရောက်စိုက်ထူသည့်တပ်ကို ဒေသခံများက မသိရှိကြ ပေ။

ခွန်ခမ်းကောင်က “အခုလို ချမ်းတဲ့ရာသီမှာ ရွာသားတွေက လယ်မြေတွေကို မနက် ၉နာရီလောက် ရောက်တော့မှ တွေ့ရ တယ်။ ဘယ်သူ လာစိုက်ထားမှန်းကို မသိဘူး။ တောင်ကြီးဘက်ထိ စုံစမ်းတော့လည်း အခုထိ မသိရသေးဘူး။”ဟု ပြောသည်။

လယ်ယာမြေ ကျောက်တိုင်စိုက်ထူခံရသည့်အကြောင်းနှင့် ပတ်သက်ပြီး ပအိုဝ့်အမျိုးသားအဖွဲ့ချုပ်(PNO)ထံ ဆက်သွယ်မေး မြန်းရာမှာ ၎င်းကိစ္စနှင့် ပတ်သက်ပြီး မသိရှိကြောင်း ဖြေကြားခဲ့သည်။

KNU/KNLA ငြိမ်းချမ်းရေးကောင်စီ အစိုးရနှင့် တွေ့မည်

2012-02-01T20:47:00.002+11:00

ဇန်န၀ါရီလ ၃၁ရက်၊ ၂၀၁၂။ စောသိန်းမြင့် (ကေအိုင်စီ)

ဗိုလ်ချုပ်ထင်မောင် ဦးစီးသည့် KNU/KNLA ငြိမ်းချမ်းရေးကောင်စီက အစိုးရ ငြိမ်းချမ်းဖော်ဆောင်ရေး အဖွဲ့ဝင်တချို့နှင့် ငြိမ်း ချမ်းရေး စကားပြောရန် လာမည့် ဖေဖော်ဝါရီလ ၇ရက်နေ့တွင် ရန်ကုန်မြို့၌ တွေ့ဆုံဆွေးနွေးမည်ဖြစ်သည်။

KNU/KNLA ငြိမ်းချမ်းရေးကောင်စီ၏ ပြောခွင့်ရ ဗိုလ်မှူးချုပ်တီမသီက “အစိုးရဘက်က ကျနော်တို့ KNU/KNLA Peace Council နဲ့ တွေ့ဖို့ ကမ်းလှမ်းလာတယ်။ ဦးခင်စိုး (အစိုးရ ငြိမ်းချမ်းရေး ဖော်ဆောင်ရေး ကော်မတီအဖွဲ့ဝင်) ကနေ တဆင့်လာ တယ်။ ရန်ကုန်မှာ တွေ့ဖို့များတယ်။ ကျနော်တို့ဘက်ကလည်း ကြိုတင်ပြင်မှုတွေ လုပ်ထားပါတယ်။”ဟု ပြောသည်။

၎င်းခရီးစဉ်အရ လာမည့် ဖေဖော်ဝါရီလ ၅ရက်နေ့ ညနေတွင် ဘားအံမြို့သို့ ထွက်ခွာမည်ဖြစ်ပြီး ၆ရက်နေ့တွင် ရန်ကုန်မြို့သို့ ဆက်လက် ခရီးထွက်ကာ (၇)ရက်နေ့တွင် အစိုးရ ငြိမ်းချမ်းရေး ကိုယ်စားလှယ်တို့နှင့် တွေ့ဆုံဆွေးနွေးကြမည်ဟု သိရသည်။

အစိုးရနှင့် သွားရောက်ဆွေးနွေးမည့်အထဲတွင် ဗိုလ်ချုပ်ထင်မောင် အပါအ၀င် ဗိုလ်ချုပ်ထော့လေး၊ ဗိုလ်ချုပ်ရင်နု၊ ဗိုလ်ချုပ်နော် ကပေါ်ထူး၊ ဗိုလ်မှူးချုပ်တီမသေတို့ ပါဝင်ပြီး လက်မှတ်ရေးထိုးရန် အဓိက ဆွေးနွေးမည်မဟုတ်ဘဲ အစိုးရအနေဖြင့် လက်တွေ့ အကောင်အထည်ဖော်ဆောင်ရေး၊ စစ်ရေးနှင့် နိုင်ငံရေး အပါအ၀င် အသေးစိတ် အချက်ပေါင်း (၁၂)ချက် ဆွေးနွေးသွားမည်ဟု သူက ဆိုသည်။

“(၁)က စားပွဲပေါ်မှာ ပြောဆိုတာမဟုတ်ဘဲ လက်တွေ့အကောင်အထည်ဖော်ဆောင်ရေး ဆွေးနွေးမယ်။ (၂)စစ်ရေးနဲ့ ပတ် သက်ပြီး ဆွေးနွေးမယ်။ နိုင်ငံရေး ဆွေးနွေးမယ်။ ဒါက အကြမ်းဖျင်းပဲ အသေးစိတ် အကြောင်းအရာတွေကတော့ အများကြီး ရှိ ပါသေးတယ်။ အဲဒါတွေအကုန်လုံး အဆင်ပြေမှသာ လက်မှတ်ထိုးရေးကို စဉ်းစားမယ်”ဟု ဗိုလ်မှူးချုပ်တီမသီက ပြောသည်။

ကရင်ငြိမ်းချမ်းရေးကောင်စီအနေဖြင့် ကရင်အမျိုးသားအစည်းအရုံး(KNU)ကဲ့သို့ အစိုးရနှင့် လက်မှတ်ရေးထိုးပြီး အစိုးရစစ်တပ် ဘက်မှ ကေအဲန်ယူနယ်မြေအတွင်း တပ်အင်အားတိုးချဲ့ခြင်း၊ စစ်ရိက္ခာများ ပို့ဆောင်ခြင်း စသည့်လုပ်ဆောင်မှုမျိုး မလိုလား ကြောင်း ပြောသည်။

ထို့အပြင် ၎င်းတို့အဖွဲ့သည် အစိုးရကိုယ်စားလှယ်များနှင့် တွေ့ဆုံမှုအပြီးတွင် အမျိုးသားဒီမိုကရေစီအဖွဲ့ချုပ် (NLD) ဥက္ကဌ ဒေါ်အောင်ဆန်းစုကြည် အပါအ၀င် ရန်ကုန်မြို့ရှိ နိုင်ငံတကာမှ သံအမတ်တချို့နှင့်လည်း တွေ့ဆုံရန် မျှော်လင့်ထားသည်ဟု သိရသည်။

KNU/KNLA ငြိမ်းချမ်းရေးကောင်စီသည် အစိုးရနှင့် ငြိမ်းချမ်းရေးတွေ့ဆုံဆွေးနွေးရာတွင် ကေအဲန်ယူ အပါအ၀င် ပြည်တွင်း ပြည်ပရှိ ကရင်ပြည်သူများ၏ အကြံပေးချက်များကို ဖိတ်ခေါ်ထားသည်ဟု ဆိုသည်။

KNU/KNLA ငြိမ်းချမ်းရေးကောင်စီအဖွဲ့ကို ဗိုလ်ချုပ်ထင်မောင် ဦးဆောင်၍ လွန်ခဲ့သည့် ၂၀၀၇ခုနှစ်က KNUမှ ခွဲထွက်ကာ နအဖစစ်အစိုးရနှင့် လက်မှတ်ရေးထိုးထားခြင်းမရှိဘဲ ငြိမ်းချမ်းရေးရယူခဲ့သည်။ ပြီးခဲ့သည့်၂၀၁၀ခုနှစ် သြဂုတ်လတွင် အစိုးရ၏ နယ်ခြားစောင့်တပ် ဖွဲ့စည်းရေးအစီအစဉ်ကို ငြင်းဆန်ခဲ့ပြီး သမ္မတ ဦးသိန်းစိန် အစိုးရ သစ်တက်လာသည့်နောက်ပိုင်း ယခု တွေ့ဆုံမှုတွင် ပထမဦးဆုံးအကြိမ်ဖြစ်သည်။

(၆၃)နှစ်မြောက် ကရင့်တော်လှန်ရေးနေ့ KNU ထိန်းချုပ်နယ်မြေများတွင် ကျင်းပ

2012-02-01T20:35:00.002+11:00

ဇန်န၀ါရီလ ၃၁ရက်၊ ၂၀၁၂။ စောသိန်းမြင့် (ကေအိုင်စီ)

ယနေ့ကျရောက်သည့် ၆၃နှစ်မြောက် ကရင့်အမျိုးသား တော်လှန်ရေးနေ့ အခမ်းအနားကို ကရင်ပြည်နယ် ကရင်အမျိုးသားအ စည်းအရုံး(KNU)၏ ထိန်းချုပ်ရာနယ်မြေတချို့တွင် ကျင်းပြုလုပ်ကြသည်ဟု သိရသည်။

ကရင်ပြည်နယ်မြောက်ပိုင်း KNU တပ်မဟာ( ၅)နယ်မြေတွင် ကျင်းပပြုလုပ်သည့် ကရင့်တော်လှန်ရေးနေ့ အခမ်းအနားတွင် လူထုပရိဿတ် ၂,၀၀၀ဦးခန့် တက်ရောက်ခဲ့ကြပြီး အခမ်းအနားကို အစီအစဉ်နှစ်မျိုးဖြင့် ပြုလုပ်ခဲ့ကြသည်ဟု သိရသည်။

ကေအဲန်ယူ တပ်မဟာ(၅) ပြောခွင့်ရ ဗိုလ်မှူးကလယ်ဒို့က “ပထမ အဆင့်ကတော့ တော်လှန်ရေးနေ့ကို ဂုဏ်ပြုတဲ့ အစီအစဉ် တွေအဖြစ် စစ်ရေးပြ၊ ဥက္ကဌမိန့်ခွန်းနဲ့၊ KWO, KYO, KSNG တို့ သ၀ဏ်လွှာတွေကို ဖတ်ကြားတယ်။ ဒုတိယအဆင့်ကတော့ ကျနော်တို့ မိခင်အစည်းအရုံးနဲ့ အစိုးရတို့ ငြိမ်းချမ်းရေးဆွေးနွေးတဲ့အကြောင်း တက်ရောက်လာတဲ့ ပြည်သူတွေကို ရှင်းလင်းပွဲ လုပ်တယ်”ဟု ဆိုသည်။

ထို့အတူ ကရင်ပြည်နယ်၊ မြ၀တီမြို့နယ်၊ နို့ဖိုးကျေးရွာတွင်လည်း ယနေ့နံနက် (၇)နာရီမှ (၉း၃၀)အထိ ကျင်းပပြုလုပ်သည့် ၆၃နှစ်မြောက် ကရင်အမျိုးသား တော်လှန်ရေးနေ့ အခမ်းအနားတွင်လည်း ကရင်ပြည်သူ ၁,၀၀၀ကျော် တက်ရောက်ဂုဏ်ပြုခဲ့ ကြသည်။

အခမ်းအနားသို့ တက်ရောက်ခဲ့သူ ရွာသူကြီးတစ်ဦးက “ ဒီမနက်ဟာ ကျနော်တို့ ကရင်တမျိုးသားလုံးရဲ့ အထွဋ်အမြတ်ထားတဲ့ နေ့တစ်နေ့ဆိုတော့ ကျက်သရေရှိလှပါတယ်။ အခုလို ကျနော်တို့တတွေ စုစုစည်းစည်းနဲ့ ဂုဏ်ပြုခွင့်ရတာ ၀မ်းမြောက်ဂုဏ်ယူပါ တယ်။ နောက်ပြီး ပရိဿတ် ထောင်နဲ့ချီ တက်ရောက်ဂုဏ်ပြုတာ တွေ့ရတော့ အထူးပဲ ၀မ်းမြောက်မိတယ်။”ဟု ပြောသည်။

ထိုအခမ်းအနားတွင် KNLA တပ်မှူးတပ်သားများ၊ ကျေးရွာ (၅)ရွာမှ ကရင်ပြည်သူများ၊ ထိုင်းနယ်စပ်မှ ကရင်ပြည်သူများနှင့် ကရင်ငြိမ်းအဖွဲ့မှ အောက်ခြေတပ်မှူး တပ်သားတချို့နှင့် နယ်စပ်ထိုင်းအာဏာပိုင်တချို့လည်း တက်ရောက်ကြပြီး စစ်ရေးပြ အစီအစဉ်၊ KNU ဥက္ကဌ ဗိုလ်ချုပ်ကြီးတာမလာဘော၏ မိန့်ခွန်းနှင့် သ၀ဏ်လွှာများ ဖိတ်ကြားခြင်း၊ တက်ရောက်လာသည့် ခေါင်းဆောင်များက မိန့်ခွန်းပြောဆိုခြင်းအပြင် ကိုယ်အင်္ဂါများ ပေးဆပ်ခဲ့သည့် တပ်မှူးတပ်သားများကို ဂုဏ်ပြုခဲ့ကြသည်။

မြ၀တီမြို့တောင်ဘက် အူးကလေးခီးစခန်း၌ KNLA တပ်ရင်း(၁၀၃)မှ မနက် ၇နာရီကျော်က ကျင်းပသည့် အလားတူ အခမ်းအ နားတွင်လည်း လူထု ၃၀၀ဦးနီးပါး လာရောက်ဂုဏ်ပြုခဲ့ကြသည်။

ယနေ့ကျရောက်သည့် (၆၃)နှစ်မြောက် ကရင့်တော်လှန်ရေးနေ့တွင် ပေးပို့သည့် KNU ဥက္ကဌ ဗိုလ်ချုပ်ကြီးတာမလာဘော၏ မိန့်ခွန်း၌ “ကရင့်တော်လှန်ရေးဟာ နှစ်ပေါင်း ၆၃နှစ်တိုင် ကြာမြင့်ခဲ့ပြီး ဖြစ်သော်လည်း ကရင်တမျိုးသားလုံး မျှော်လင့်ချက်ပန်း တိုင်သို့ မရောက်ရှိသေးတဲ့အတွက် ကရင်တမျိုးသားလုံး လိုလားတဲ့ လွတ်လပ်ငြိမ်းချမ်းပြီး ကိုယ်ပိုင်ပြဌာန်းခွင့်ရှိတဲ့ ကရင်ပြည် ရရှိရေးကို ဆက်လက် တိုက်ပွဲဝင်ရဦးမှာ ဖြစ်ပါတယ်။”ဟု ပြောကြားခဲ့သည်။

ထို့အပြင် KNU ၏ လမ်းညွှန်မှုအောက်မှ ကရင်လူထုနှင့် ကရင်တပ်မတော်သားများအနေဖြင့် မတရားမှုမှန်သမျှကို ကျော်လွှား နိုင်ရန် ခိုင်မာသောသတ္တိ၊ မှန်ကန်သော အမျိုးသားစိတ်ဓာတ်ဖြင့် ဥက္ကဌကြီး၏ မူ ၄ချက်နှင့် ရပ်တည်ပြီး ဘ၀တူ အဖိနှိပ်ခံ တိုင်းရင်းသားများ၊ ဒီမိုကရေစီအင်အားစုများနှင့် လက်တွဲကာ အာဏာရှင်စနစ် ချုပ်ငြိမ်းသွားရေး ဘက်ပေါင်းစုံ ဆက်လက် တိုက်ပွဲဝင်သွားရန် တိုက်တွန်းခဲ့သည်။

အမျိုးသားတန်းတူရေးနှင့် ကိုယ်ပိုင်ပြဌာန်းခွင့်ရရေးအတွက် ဖွဲ့စည်းခဲ့သည့် ကရင်အမျိုးသားအစည်းအရုံး(KNU)နှင့် ကရင်အ မျိုးသား ကာကွယ်ရေးတပ်ဖွဲ့ KNDOတို့ကို ၁၉၄၉ခုနှစ် ဇန်န၀ါရီလ ၃၀ရက်နေ့တွင် ထိုစဉ် အုပ်ချုပ်သူ ဦးနုအစိုးရက မတရား အသင်းအဖြစ် ကြေညာခဲ့ပြီးနောက် ဇန်န၀ါရီလ ၃၁ရက်နေ့တွင် ရန်ကုန်ရှိ KNDO ဌာနချုပ်ကို ဦးနု ဦးဆောင်သည့် ၀ိုင်းဝန်း တိုက်ခိုက်ခဲ့သဖြင့် တပြည်လုံးရှိ ကရင်လူမျိုးများက ပြန်လည် ခုခံတိုက်ခိုက်ရာမှ ကရင့်လက်နက်ကိုင်တော်လှန်ရေး စတင် ဖြစ်ပေါ်ခဲ့သည်။

ငြိမ်းချမ်းရေးတည်ဆောက်ရာတွင် ပါဝင်သွားမည်ဟု ကရင်အမျိုးသမီးများ ပြောဆို

2012-01-31T20:13:00.000+11:00

ဇန်န၀ါရီလ ၃၀ရက်၊ ၂၀၁၂။ (ကေအိုင်စီ)

ကရင်တမျိုးသားလုံးအတွက် ငြိမ်းချမ်းရေးရရှိရန် ကြိုးပမ်းတည်ဆောက်သည့် အခန်းကဏ္ဍလုပ်ငန်းစဉ်တလျှောက်တွင် ကရင်အမျိုး သမီးများ ပူးပေါင်းပါဝင်ဆောင်ရွက်သွားမည်ဟု ကရင်အမျိုးသမီးအစည်းအရုံး(KWO) က ပြောသည်။

KWO ၏ ၅ကြိမ်မြောက် ကွန်ဂရက်အပြီး ဒုတိယအကြိမ်မြောက် ဗဟိုကော်မတီဝင်များ အစည်းအဝေး၌ လက်ရှိ မြန်မာနိုင်ငံ၏ ငြိမ်း ချမ်းရေးဖြစ်စဉ်များကို ဆွေးနွေးသုံးသပ်ပြီး ငြိမ်းချမ်းရေးတည်ဆောက်မှုအဆင့်တိုင်းတွင် အမျိုးသမီးများ ပါဝင်ရန် အရေးကြီး ကြောင်း ယနေ့ ကြေညာချက် ထုတ်ပြန်လိုက်ခြင်း ဖြစ်သည်။

“ငြိမ်းချမ်းရေးဆွေးနွေးပွဲမှာ ဆိုလို့ရှိရင် ကျမတို့ အမျိုးသမီးတွေရဲ့ အခန်းကဏ္ဍက အရေးကြီးပါတယ်။ ကုလသမဂ္ဂ လုံခြုံရေး ကောင်စီရဲ့ ဆုံးဖြတ်ချက်အမှတ် ၁၃၂၅နဲ့အညီ ကျမတို့ ကရင်အမျိုးသားအစည်းအရုံးနဲ့ ပူးပေါင်းဖို့ ဆုံးဖြတ်ခဲ့တာပါ။”ဟု KWO အတွင်းရေးမှူး နန်းဒါးအဲ့ကလယ်က ပြောသည်။

ထို့အတူ ကရင်အမျိုးသားအစည်းအရုံး KNU လည်း နိုင်ငံရေး တွေ့ဆုံဆွေးနွေးရေး လုပ်ငန်းစဉ်များတွင် အမျိုးသမီးများ ပူးပေါင်းပါ ဝင်မှုရှိလာအောင် ဆောင်ရွက်သွားမည်ဖြစ်ကြောင်း ကြေညာချက် ထုတ်ပြန်ထားသည်။

ဇန်နဝါရီလ ၂၆ရက်နေ့မှ ၂၈ရက်နေ့အထိ နယ်စပ်တနေရာတွင် ကျင်းပခဲ့သည့် KWO ဒုတိယအကြိမ် ဗဟိုကော်မတီဝင်များ အစည်းအဝေးသို့ ခရိုင် ၇ခုမှ ကိုယ်စားလှယ်များ၊ ဒုက္ခသည်စခန်းမှ ကိုယ်စားလှယ်များ၊ အထူးဖိတ်ကြားထားသည့် ဧည့်သည်များ နှင့် လေ့လာသူများ အပါအဝင် ကရင်အမျိုးသမီးကိုယ်စားလှယ် စုစုပေါင်း ၄၀ဦး တက်ရောက်ခဲ့ကြသည်။

ဆက်လက်၍ နန်းဒါးအဲ့ကလယ်က “ဒီ peace process မှာ ကျမတို့ အမျိုးသမီးတွေရဲ့ တောင်းဆိုချက်တွေ အများကြီးရှိတယ်။ တကယ်လို့ ကျမတို့ ပူးပေါင်းပါဝင်မှု မရှိဘူးဆိုရင် အဲဒါတွေ ကျန်ရစ်ခဲ့မှာ။ အဲလိုမျိုး တချိန်တည်း၊ တခါတည်းနဲ့ အမျိုးသားတွေနဲ့အ တူ တောင်းဆိုမှု ပြုနိုင်ဖို့ အမျိုးသမီးတွေ မကျန်ခဲ့အောင်ဆိုပြီး ပူးပေါင်းဖို့ဆိုတဲ့ဟာကို သဘောတူလာတာပါ"

ပြည်တွင်းစစ်ဖြစ်ပွားလျှက်ရှိသည့် ကရင်ပြည်နယ်၏ ဒေသအသီးသီးတွင် ကရင်အမျိုးသမီးများနှင့် ကလေးသူငယ်များ တွေ့ကြုံခံ စားရသည့် လူ့အခွင့်အရေး ချိုးဖောက်မှုများကြောင့် လိုအပ်ချက်များ၊ စိုးရိမ်ချက်များနှင့် အကြံပြုချက်များကို ကရင်တမျိုးသားလုံး အတွက် ငြိမ်းချမ်းရေးတည်ဆောက်မှု ဖြစ်စဉ်တွင် ကရင်အမျိုးသမီးများ ပါဝင်တင်ပြ တောင်းဆိုနိုင်ရန် ကော်မတီတရပ်ကိုလည်း ဖွဲ့ စည်းခဲ့သည်။

KWO ကို ကရင့်တော်လှန်းရေး စတင်ခဲ့သည့် ၁၉၄၉ ခုနှစ်မှ စတင်ဖွဲ့စည်းခဲ့ပြီး လက်ရှိအချိန်တွင် ကရင်ပြည်နယ်အတွင်းရှိ ခရိုင် ၇ခုနှင့် ထိုင်း-မြန်မာနယ်စပ်ရှိ ဒုက္ခသည်စခန်းများမှ အဖွဲ့ဝင်ပေါင်း ၄၉,၀၀၀ဦးရှိသည်။

ထို့အပြင် အမျိုးသမီးများ စွမ်းရည်မြှင့်တင်ရေးလုပ်ငန်းများ၊ အမျိုးသမီးများနှင့် ကလေးသူငယ်များ၏ အထူးလိုအပ်ချက်များကို ကူညီထောက်ပံ့ခြင်း၊ အမျိုးသမီးများအပေါ် မြန်မာအစိုးရစစ်တပ်မှ လူ့အခွင့်အရေး ချိုးဖောက်မှုများ၊ အထူးသဖြင့် အမျိုးသမီးများ အပေါ် လိင်ပိုင်းဆိုင်ရာ ချိုးဖောက်မှုများ အပါအဝင် အမျိုးသမီးဆိုင်ရာ ကိစ္စရပ်များကို သတင်းအချက်အလက်များ ကောက်ယူစု ဆောင်းခြင်းနှင့် ကိုယ်စားပြု ထုတ်ဖော်ပြောဆိုခြင်း စသည့်လုပ်ငန်းများကို လုပ်ကိုင်ဆောင်ရွက်လျှက်ရှိသည်။

ဘာကြောင့် တရားဥပဒေ စိုးမိုးမှု လိုအပ်နေသလဲ

2012-01-31T20:11:00.003+11:00

ကျော်ဇင်ညွှန့်

(ဇန်န၀ါရီလ ၃၀ရက်၊ ၂၀၁၂)

မြန်မာနိုင်ငံရဲ့ အခြေခံလူတန်းစားတွေဟာ ဘယ်သူတွေလဲလို့ မေးချင်ပါတယ်။ လယ်သမားလား၊ အလုပ်သမားလား၊ ကျောင်းသားလား၊ စစ်သားလား၊ ဆင်းရဲသားလား၊ သူဌေးတွေလား၊ ပညာတတ်တွေလား၊ စီးပွားရေးသမားတွေလား စသဖြင့် လူတန်းစား အလွှာအများကြီးထဲက ထုတ်နှုတ်မေးရမလို ဖြစ်နေပါတယ်။ အခြေခံ ဆိုတာ မရှိမဖြစ် လိုအပ်တယ်လို့ အဓိပ္ပာယ် ရပါတယ်။ အခြေခံမရှိဘဲ ဘာမှ မရပ်တည်နိုင်သလို ...အခြေခံလူတန်းစား မရှိဘဲ နိုင်ငံတခု မရပ်တည်နိုင်ပါဘူး။
တကယ်တော့ တိုင်းပြည်တခု တင့်တယ်လျောက်ပတ်စွာ နေနိုင်အောင် ပံ့ပိုးထောက်ကန်ပေးထားနိုင်တဲ့ လူတန်းစားအလွှာ မှန်သမျှ အခြေခံလူတန်းစား ဖြစ်ပါတယ်။ ဥပမာ- လယ်ယာစိုက်ပျိုးရေးကို အဓိက ထားနေရတဲ့ မြန်မာနိုင်ငံမှာ လယ်သမား ကြီးတွေဟာ အခြေခံလူတန်းစား တရပ်ပါပဲ။ ဒီလိုပဲ ကုန်ထုတ်လုပ်ငန်းတွေနဲ့ နိုင်ငံကို အကျိုးပြုနေသူတွေဟာလည်း အခြေခံလူတန်းစားဖြစ်သလို နောင်တခေတ် တိုင်းပြည်ကို ဦးဆောင် တည်ဆောက်ကြမယ့် ကျောင်းသားတွေ၊ ပြည်ပရန်ကို တားဆီး ခုခံကာကွယ်မယ့် စစ်သားတွေဟာလည်း အခြေခံလူတန်းစားတွေ ဖြစ်ကြပါတယ်။

နှစ်ပေါင်း (၅ဝ) လောက် အာဏာရှင် ဝါဒမှိုင်းအောက်မှာ ပိတ်ဆို့ခံထားရတဲ့ အမြင်ကြောင့် အခြေခံလူတန်းစားဆိုရင် ဆင်းရဲ သားပဲလို့ ထင်တတ်ကြပါတယ်။ ဆိုက်ကားနင်းသူ၊ ကုန်ထမ်းသူ၊ စားပွဲထိုးသူ၊ လမ်းပေါ်က သူတောင်းစား စသဖြင့် ထင်တတ် ကြပါတယ်။ ဘယ်လောက် ဝင်ငွေရရှိသလဲ ဆိုတဲ့ပေတံနဲ့ တိုင်းတာ ကြည့်ကြပါတယ်။ အမှန်တကယ် တိုင်းတာရမှာက တိုင်းပြည်အတွက် ဘယ်လောက် အလုပ်လုပ်ပေးနိုင်သလဲ ဆိုတဲ့ပေတံသာ ဖြစ်ပါတယ်။ အခြေခံ လူတန်းစားကို အောက်ဆုံး အဆင့်လို့ တချို့လူတွေက ယူဆတတ်ကြပါတယ်။ အထင်မကြီးကြပါဘူး။ အဖက်မတန်သလို နှိမ့်ချ ခွဲခြား ဆက်ဆံကြပါ တယ်။ လက်အောက်ငယ်သားလို အမိန့်ပေးကြပါတယ်။ ရသလောက် အမြတ်ထုတ်ကြပါတယ်။ ဒါတွေအားလုံးဟာ အမှားကြီး မှားနေပါတယ်။

အခြေခံအားဖြင့် မရှိမဖြစ်တဲ့ လူတန်းစားတွေရဲ့ ဘဝကို ကာကွယ်ပေးဖို့ လိုအပ်ပါတယ်။ စောင့်ရှောက်ပေးရပါမယ်။ သူတို့ဘဝ ကို မြှင့်တင်ပေးရပါမယ်။ ဒီအတွက် Rule of Law လို့ခေါ်တဲ့ တရားဥပဒေ စိုးမိုးမှုကို ထိပ်ဆုံးအဆင့်ကနေ ရပ်ကွက်/ကျေးရွာ အဆင့်ထိ မှန်မှန်ကန်ကန် ကျင့်သုံးနိုင်ရမှာ ဖြစ်ပါတယ်။

တရားဥပဒေ စိုးမိုးမှုရှိမှ ရပ်ကွက်/ကျေးရွာ ငြိမ်ဝပ်ပိပြားတယ်လို့ တချို့လူတွေက ထင်ကြပါတယ်။ သူပုန်သူကန်မရှိ တိုင်းပြည် တည်ငြိမ်အေးချမ်းတာဟာ တရားဥပဒေ စိုးမိုးမှုရှိတာကြောင့်လို့လည်း ထင်ကြပါတယ်။ အပြည့်အစုံ မမှန်ပါဘူး။ ဒါဟာ အရင် မြန်မာစစ်အစိုးရတွေက မလိမ့်တပတ်နဲ့ ရိုက်သွင်းထားတဲ့ ဝါဒဖြန့် စကားလုံးတွေသာ ဖြစ်ပါတယ်။ အာဏာရှင်စနစ်မှာ တရား ဥပဒေ စိုးမိုးမှု မရှိပါဘူး။ ဒီမိုကရေစီ နိုင်ငံရေးစနစ်မှာသာ တရားဥပဒေ စိုးမိုးမှု ရှိပါတယ်။

ဖြစ်နိုင်သမျှ ဗဟုသုတ နည်းအောင် အကွက်ချစီမံထားလို့ ပြည်သူတွေ အတွေးအခေါ် မရင့်သန်ဘဲ ဖြစ်နေတာကိုး။ ပြီးတော့ အတွေးအခေါ် ရင့်သန်ခွင့် ပိတ်ပင်ခံနေရတာကို အခွင့်ကောင်းယူပြီး အမြတ်ထုတ်တဲ့ အာဏာရှင် အကျင့်ဆိုးကြောင့် အမှား ကို အမှန်၊ အမှန်ကို အမှား တလွဲထင်နေကြရတာ ဖြစ်ပါတယ်။
(ကျနော် ဒီနေရာမှာ ကြုံကြိုက်တာနဲ့ ဖြတ်ပြောချင်တာလေး ရှိပါတယ်။ အာဏာရှင်တွေက ပြည်သူတွေအပေါ် ကောင်းကောင်းကြီး နှိပ်ကွပ်နိုင်သွားတဲ့အခါမှာ တချို့လူတွေက ဂရုဏာဒေါသလိုလို၊ မခံချိမခံသာလိုလိုနဲ့ ပြောတတ်တဲ့ စကားတခွန်းရှိပါတယ်။ “ဒါဟာ ဗိုလ်နေဝင်းတို့၊ ဗိုလ်သန်းရွှေတို့ တော်လို့ မဟုတ်ဘူး။ ကိုယ်တွေက ညံ့လို့ ဖြစ်ရတာ” ဆိုတဲ့စကားပါ။ ပြောတဲ့သူတွေဟာ ပြဿနာရဲ့ ဇစ်မြစ်ကို လိုက်မကြည့်ဘဲ လက်တလော အရှုံးအနိုင်ကိုသာ မျက်ခုံးမွှေးတဆုံး ကြည့်ပြောတဲ့သူတွေပဲလို့ ကျနော် မှတ်ချက်ပေးလိုပါတယ်။ တကယ်တော့ ကျနော်တို့ မြန်မာပြည်သူတွေဟာ ခေတ်အဆက် ဆက် မညံ့ပါဘူး။ မညံ့ပေမယ့်လည်း ညံ့အောင် အဓမ္မ ဖိနှိပ်ခံနေရတဲ့ဘဝကနေ ရုန်းမထွက်သာသေးလို့ ဖြစ်နေခဲ့ရတာပါ။ တကယ်တော့ ကိုယ့်ထက်သာမှာ စိုးလို့ နောက်လူတွေကို လမ်းပိတ်ဆို့ထားတတ်သူတွေ၊ အာဏာရှင်စရိုက် လက်ခံကျင့်သုံး သူတွေက အခြားသူတွေကို ညံ့အောင် တမင်တကာ လုပ်ထားနိုင်လို့သာ လတ်တလော အရှုံးပေါ်ခဲ့ရတာ ဖြစ်ပါတယ်။)

ကျနော် ဖြတ်ပြောလိုက်တဲ့ စကားဟာ နည်းနည်းတော့ ရှည်လျားသွားပါတယ်။ အဓိက ဆိုလိုရင်းကတော့ အာဏာရှင်စနစ် ဟာ ပြည်သူတွေကို ညံ့ဖျင်းသေးသိမ်သွားအောင် တမင်တကာ အကွက်ချ လုပ်ယူတဲ့အကြောင်းပါ။ ဒါဟာ တရားဥပဒေ စိုးမိုးမှု နဲ့ ဖြောင့်ဖြောင့်ကြီး ဆန့်ကျင်ဘက်သဘော ဖြစ်နေပါတယ်။

တရားဥပဒေ စိုးမိုးမှု (Rule of Law) ဆိုတာ ရှင်းရှင်းလေးပါ။ ဥပဒေနဲ့အညီ အုပ်ချုပ်တာပဲ ဖြစ်ပါတယ်။ ဘယ်လိုအုပ်ချုပ်တာ လဲ၊ ဘယ်သူတွေက အုပ်ချုပ်တာလဲ၊ ဘာတွေကို အခြေခံထားပြီး အုပ်ချုပ်တာလဲဆိုတာ ကျနော်တို့ နည်းနည်းလေး အတွေး နယ်ချဲ့ကြည့်ကြပါစို့။

Rule of Law အရ အုပ်ချုပ်သူ ဆိုတာ ဟိုးထိပ်ဆုံး အမြင့်ဆုံး အာဏာယူထားသူကနေ အနိမ့်ဆုံး အာဏာယူထားသူတွေအ ထိ အုပ်ချုပ်ရေးပိုင်းမှာ ပါဝင်နေသူတွေ ဖြစ်ကြပါတယ်။ ဒါဆိုရင် သမ္မတ၊ ဝန်ကြီးချုပ်၊ ဝန်ကြီး၊ ရပ်ကွက် အုပ်ချုပ်ရေးမှူး၊ ရာအိမ်မှူး၊ ဆယ်အိမ်မှူးတို့ကို မျက်စိထဲ ပြေးမြင်မိကြပါလိမ့်မယ်။ အမှန်ပါပဲ သူတို့ဟာ အုပ်ချုပ်သူ လူတန်းစားတွေထဲမှာ အုပ်ချုပ်ပိုင်ခွင့် အဆင့်ဆင့်နဲ့ ပါဝင်ကြပါတယ်။ သူတို့သာမက စစ်တပ်ထဲက တိုင်းမှူး၊ တပ်ရပ်မှူးတွေလည်း ပါသလို စက်ရုံမှူး၊ လှေသူကြီး၊ ဘုရား ဂေါပကတွေလည်း ပါဝင်ကြပါတယ်။ ယုတ်စွအဆုံး ဆရာ-ဆရာမတွေနဲ့ မိသားစု အိမ်ထောင်ဦးစီးတွေ တောင် အုပ်ချုပ်ရေးကဏ္ဍမှာ ပါကြပါတယ်။

ဒါဆိုရင် တချို့က စောဒက တက်ချင်ပါလိမ့်မယ်။ “ကြီးကြီးကျယ်ကျယ် ကိုယ့်အိမ်နဲ့၊ ကိုယ့်မိသားစုနဲ့ကိုယ် တရားဥပဒေ စိုးမိုး ရေး (Rule of Law) ကို လိုက်နာနေရဦးမှာလား။ ကိုယ့်မိသားစုနဲ့ကိုယ် မိသားစု စည်းကမ်းလေး ထုတ်ပြီး လွတ်လွတ်လပ်လပ် အေးအေးဆေးဆေး နေမှာပေါ့။ ဥပဒေတွေ ဘာတွေနဲ့ မရှုတ်ချင်ပါဘူး” ဆိုပြီး ပြောချင်ပြောကြမှာပါ။ တကယ်တော့ မိသားစု စည်းကမ်းဆိုတာ မိသားစုဝင်အားလုံးက သဘောတူ လက်ခံပြီး လိုက်နာနိုင်ကြဖို့ “စည်းကမ်း” လို့ အများသိနေကြတဲ့ Rule of Law အမျိုးအစားတခု ပါပဲ။ မိသားစု၊ ကျောင်း၊ စက်ရုံ-အလုပ်ရုံ၊ အသင်းအဖွဲ့ ဖြစ်ကြလို့ မိသားစု စည်းကမ်း၊ ကျောင်းစည်း ကမ်း၊ အလုပ်ရုံစည်းကမ်း၊ စစ်စည်းကမ်းအဖြစ် ခေါ်ကြတာဖြစ်ပြီး တနိုင်ငံတည်းအနေနဲ့ အားလုံးကို ပေါင်းစုလိုက်တဲ့အခါမှာ Rule of Law ဖြစ်လာရပါတယ်။

အမှန်တော့ အုပ်ချုပ်တယ် ဆိုတဲ့ ဝေါဟာရကိုတောင် ဒီထက်ပိုမိုသင့်လျော်အောင် သုံးနိုင်ရင် ပိုကောင်းပါလိမ့်မယ်။ အခုတော့ အသားကျနေပြီဆိုတော့ ဒီဝေါဟာရကို ပြင်ဖို့ မလွယ်လှပါဘူး။ အုပ်ချုပ်တယ် ဆိုရာမှာ အုပ်ချုပ်သူဟာ သူ့စိတ်ဆန္ဒရှိတဲ့အ တိုင်း အုပ်ချုပ်ရတာ မဟုတ်ဘဲ အများလက်ခံထားတဲ့ ဥပဒေ စည်းမျဉ်းစည်းကမ်းနဲ့အညီ အုပ်ချုပ်ရတာ ဖြစ်ပါတယ်။ ဒါကြောင့် Rule of Law မှာ တရားဥပဒေရဲ့အထက် ဘယ်သူမှ မရှိစေရဘူး (No one is above the law.) ဆိုပြီး စိတ်ထင်တိုင်း မအုပ် ချုပ်နိုင်အောင် ကန့်သတ်ထားရတာ ဖြစ်ပါတယ်။ အစိုးရ ဖြစ်ရင်လည်း ပြည်သူတွေအပေါ် ပရမ်းပတာ မအုပ်ချုပ်နိုင်အောင် စီမံထားရပါတယ်။ စီမံထားပုံကတော့ ဖွဲ့စည်းပုံ အခြေခံဥပဒေ (Constitution) ပါပဲ။ အခြေခံဥပဒေအရ တရားဝင် လုပ်ဆောင် ပိုင်ခွင့်တွေ၊ ရပိုင်ခွင့်တွေမှာလည်း နိုင်ငံတကာနဲ့ တန်းတူ ဖြစ်နေစေရပါတယ်။ ဥပမာအားဖြင့် ကုလသမဂ္ဂရဲ့ အပြည်ပြည် ဆိုင်ရာ လူ့အခွင့်အရေး ကြေညာစာတမ်းကြီးကို နိုင်ငံတိုင်းက လေးစားလိုက်နာရသလိုမျိုး၊ ဂျီနီဗာ စစ်ရေးသဘောတူညီချက် တွေကို စစ်တပ်တိုင်းက လိုက်နာရတာမျိုး ဖြစ်ပါတယ်။

ဒါကိုကြည့်ရင် အခြေခံဥပဒေဟာ ဘယ်လောက်ထိတောင် အရေးပါနေသလဲ ဆိုတာ တွေ့နိုင်ပါမယ်။ အခြေခံဥပဒေဟာ အုပ် ချုပ်သူတွေရဲ့ စိတ်ကြိုက် လုံးဝ မဖြစ်စေရပါဘူး။ ပြည်သူတွေရဲ့ စိတ်ဆန္ဒ သဘောထားအပေါ်မှာ အများအားဖြင့် အခြေခံထား ရတာပဲ ဖြစ်ပါတယ်။ အဲဒီလို မဖြစ်မချင်း အခြေခံဥပဒေကို ပြင်ဆင်နေရမှာ ဖြစ်သလို အများစုသဘောအရ ပြင်ဆင်နိုင်ခွင့်ကို လည်း ရှောရှောရှူရှု ခွင့်ပြုထားရမှာ ဖြစ်ပါတယ်။

Rule of Law နဲ့ အုပ်ချုပ်တာကို နှိုင်းယှဉ်စရာ အကောင်းဆုံးက အာဏာရှင်စနစ် ဖြစ်ပါတယ်။ အာဏာရှင်စနစ်မှာ အာဏာရှင် က သူ့စိတ်ကြိုက် အုပ်ချုပ်ပါတယ်။ ပါးစပ်ထဲထွက်ရာ အမိန့် ဖြစ်နေပါတယ်။ Rule of Law ရှိနေရင် အုပ်ချုပ်သူ ဘယ်သူမဆို သူတို့စိတ်ကြိုက် အုပ်ချုပ်ခွင့် မရဘဲ အများပြည်သူအကြိုက်သာ အုပ်ချုပ်ရတော့မှာ ဖြစ်ပါတယ်။ ဒါ့အပြင် Rule of Law ဟာ အာဏာရှင်စနစ်ကို တားဆီးဖို့လည်း ဖြစ်ပြီး ပြည်သူတွေရဲ့ အခွင့်အရေးတွေကို ကာကွယ်ပေးဖို့လည်း ဖြစ်ပါတယ်။

Rule of Law (တရားဥပဒေ စိုးမိုးရေး) ကို နှစ်သက်သဘောကျတယ်ဆိုရင် ဟာကွက်မရှိ ခိုင်မာနေအောင် တည်ဆောက်ယူ ကြရပါမယ်။ လက်ရှိ Rule of Law (တရားဥပဒေ စိုးမိုးမှု) ဟာ တကယ်တော့ အခြေခံလူတန်းစား အပါအဝင် ပြည်သူတရပ် လုံးကို ဘာမှ မကာကွယ်ပေးနိုင်သေးပါဘူး။ ဒါကြောင့် Rule of Law ကို အမြန်ဆုံး ပြန်လည် ပြုပြင်နိုင်ဖို့ အရေးတကြီး ကြိုး ပမ်းနေကြရတာ ဖြစ်ပါတယ်။

ဒီကနေ့ အချိန်အခါမှာ တရားဥပဒေ စိုးမိုးမှုကို ကြိုးပမ်းဖို့ စကားကို ဘယ်သူတွေပြောပြော…..ပြောတဲ့သူကို ကျနော်တို့ ထောက်ခံရပါမယ်။ အားပေးရပါမယ်။ ဝန်းရံရပါမယ်။ အခုလို မြန်မာ့နိုင်ငံရေး အခင်းအကျင်းမှာ နိုးနိုးကြားကြား ပြည်သူ့အင် အားတွေဟာ တချက်ကလေး ညီလိုက်တာနဲ့ လက်လှမ်းမီလုလု အောင်ပန်းကို ဇတ်ကနဲ ဆွဲယူနိုင်တော့မှာ ဖြစ်ပါတယ်။

ကေအဲန်ယူ တပ်မဟာ(၄) ဘက်တွင် အစိုးရစစ်တပ်များ တိုးချဲ့ကာ ရိက္ခာပို့နေ

2012-01-31T09:59:00.000+11:00

Monday, 30 January 2012

ဇန်န၀ါရီလ ၃၀ရက်၊ ၂၀၁၂။ စောသိန်းမြင့် (ကေအိုင်စီ)

ကရင်အမျိုးသားအစည်းအရုံး(ကေအဲန်ယူ)၏ တပ်မဟာ(၄)နယ်မြေဖြစ်သည့် တနင်္သာရီတိုင်း၊ တနင်္သာရီမြို့နယ်၊ မေတ္တာမြို့ နယ်ခွဲတွင် ယခုရက်ပိုင်းအတွင်း အစိုးရစစ်တပ်မှ တပ်အင်အားတိုးချဲ့မှုများနှင့်အတူ ရိက္ခာပို့ဆောင်မှုများ ဆက်တိုက် လုပ် ဆောင်လျှက်ရှိသည်ဟု သိရသည်။
တပ်အင်အား ၁,၀၀၀ကျော်ရှိသည့် စစ်ကွပ်ကဲရေးဌာနချုပ် အမှတ်(၂၀)နှင့် နည်းဗျူဟာ(၁)၊ (၃)တို့မှ တပ်ရင်း ၇ရင်းသည် စစ် ကား ၅၀စီးဖြင့် စစ်ဗျူဟာ(၁)ဌာနချုပ် ရေဖြူရွာသို့ ယခုလ ၂၉ရက်နေ့က ရောက်ရှိခဲ့သကဲ့သို့ စစ်ဗျူဟာ(၂)မှလည်း ရိက္ခာပို့ ကား (၂၀)စီးသည် ထားဝယ်မှ အိုင်ဝိုင်းစခန်းသို့ ရိက္ခာပို့ဆောင်ရန်အတွက် မေတ္တာစခန်းသို့ ရောက်ရှိခဲ့ပြီဟု စစ်ဘက်ဆိုင်ရာ သတင်းအရ သိရသည်။

ကေအဲန်ယူ တပ်မဟာ(၄)မှ အမည်မဖော်လိုသူ တပ်ဘက်အရာရှိတစ်ဦးက “အခု စကခ (၂၀) ရောက်လာပြီ။ စကခ(၁၃)၊ (၈)တို့ အခုထိ ပြန်မဆင်းဘူး။ ပြောတာက တပ်ချိန်းတယ်ဆိုပေမယ့် ဒါဟာ တပ်အပြောင်းအလဲ လုပ်ဆောင်တယ်လို့ ပြောလို့ မရဘူး။ တပ်အင်အား ထပ်ဖြည့်တယ်လို့ ပြောရမှာ။”ဟု ပြောသည်။
သို့သော် ကေအဲန်ယူ ဘိတ်ထားဝယ်ခရိုင် ဥက္ကဌ ပဒိုစောကွယ်ထူးဝင်းကတော့ အစိုးရစစ်တပ်၏ နှစ်စဉ်ပုံမှန် တပ်အပြောင်းအ လဲ လုပ်ဆောင်ခြင်းဖြစ်ပြီး ကေအဲန်ယူနှင့် အစိုးရတို့ ငြိမ်းချမ်းရေး တွေ့ဆုံဆွေးနွေးမှုကို ပျက်ပြယ်နိုင်သည့် အခြေအနေတွင် မရှိကြောင်း ပြောသည်။
၎င်းက “စကခ(၂၀)နဲ့ စကခ(၁၃)တို့ တနှစ်တကြိမ် ပုံမှန် တပ်အပြောင်းအလဲ လုပ်ဆောင်တာပါ။ ထူးခြားတဲ့ လှုပ်ရှားမှုတွေ မတွေ့ရပါဘူး။ အစိုးရနှင့် ကျနော်တို့ ငြိမ်းချမ်းရေးဆွေးနွေးရေး အခြေအနေ ပျက်ပြယ်နိုင်လောက်တဲ့ အခြေအနေမျိုးထိတော့ သူတို့ (အစိုးရတပ်)ဘက်က လုပ်ဆောင်မှာ မဟုတ်ပါဘူး။”ဟု ပြောသည်။
ထို့အပြင် ကမ်းရိုးတန်းတိုင်း စစ်ဌာနချုပ်၏ ညွှန်ကြားချက်အရ ယခုလ ၂၀ရက်နေ့တွင်လည်း မေတ္တာမြို့နယ်ခွဲအတွင်းရှိ မေတ္တာကျေးရွာအုပ်စု၊ မြင်းခံဘော်ကျေးရွာအုပ်စု၊ ဖောင်းတော်ကျေးရွာအုပ်စုတို့ ရွာ ၆ရွာမှ စက်လှေ ၈၅စီးအား မေတ္တာစခန်းမှ (ကျောက်ထုံးသို့) ရိက္ခာပို့ဆောင်ရန် လုပ်အားပေး ခေါ်ယူခိုင်းစေခဲ့ကြောင်း ဒေသခံများက ပြောဆိုသည်။
၎င်းရိက္ခာများ သယ်ယူပို့ဆောင်ရာတွင် လမ်းကြောင်းလုံခြုံရေးအား ဒုဗိုလ်မှူးကြီး အောင်ကျော်ဝင်း ဦးစီးသည့် ခြေလျင်တပ် ခလရ(၁၀၄)တပ်ရင်းနှင့် ဗိုလ်မှူးဇေယျဟန် ဦးစီးသည့် ခြေမြန်တပ်ရင်း-ခမရ(၅၆၀) တပ်ရင်းတို့က တာဝန်ယူပေးလျှက်ရှိ သည်ဟု သိရသည်။
အလားတူ KNU တပ်မဟာ(၁)၊ (၂)၊ (၃)၊ (၅)နှင့် (၆)နယ်မြေများဘက်တွင်လည်း နှစ်ဖက် အပစ်အခတ်ရပ်ဆိုင်းရေး ပဏာမ သဘောတူလက်မှတ် မရေးထိုးခင်ကတည်းက ယခုအချိန်ထိ အစိုးရစစ်တပ်ဘက်မှ တပ်အပြောင်းအလဲနှင့် ရိက္ခာပစ္စည်းပို့ ဆောင်မှုများ လုပ်ဆောင်လာခဲ့သည်။
ယခုလ ၁၂ရက်နေ့က ကရင်ပြည်နယ်၊ ဘားအံမြို့တွင် ပြုလုပ်သည့် ကေအဲန်ယူ ငြိမ်းချမ်းရေး ဖော်ဆောင်ရေးအဖွဲ့နှင့် အစိုးရ ၏ငြိမ်းချမ်းရေး ဖော်ဆောင်ရေးအဖွဲ့တို့ တွေ့ဆုံဆွေးနွေးပွဲတွင် အပစ်အခတ်ရပ်ဆိုင်းရေး အပါအ၀င် ပဏာမ သဘောတူညီမှု ကို ပြည်နယ်အဆင့် လက်မှတ်ရေးခဲ့ကြသည်။
ထိုသဘောတူညီချက်အရ ၄၅ရက်အတွင်း ပြည်ထောင်စု အစိုးရအဖွဲ့နှင့် နောက်တကြိမ် ထပ်မံ တွေ့ဆုံရမည်ဖြစ်ပြီး ဇန်န၀ါရီ လ ၂၃ရက်နေ့မှ ၂၅ရက်နေ့အထိ ကေအဲန်ယူ၏ ဒုတိယအကြိမ် အရေးပေါ် ဗဟိုကော်မတီ အစည်းအဝေး၏ ထုတ်ပြန်ကြေ ညာချက်တွင် အပစ်အခတ်ရပ်စဲရေးအတွက် ယုံကြည်မှု တည်ဆောက်နိုင်ရန် ကေအဲန်ယူ နယ်မြေအတွင်း မြန်မာအစိုးရမှ ၎င်းတို့တပ်များကို လျှော့ချပေးခြင်း၊ ရုတ်သိမ်းပေးခြင်းကိစ္စနှင့် တပ်နေရာယူထားသည့်ကိစ္စများကို နောက်တကြိမ် တွေ့ဆုံမှု တွင် ညှိနှိုင်းဆွေးနွေးသွားမည်ဖြစ်ကြောင်း ဖော်ပြထားသည်။

2012-01-30T23:55:00.004+11:00

မှတ်ပုံတင်ရဖို့ ငြိမ်းချမ်းရေးလုပ်ကြစို့

2012-01-30T09:20:00.000+11:00

     ခေါင်းစဉ်ကြီးက
     တကယ်ပြောတာလား ...
     ရွဲ့ပြောတာလား ...
     နောက်တာလား ...
     အားလုံး ဟုတ်ပါတယ်လို့ ယူဆနိုင်ပါတယ် ။
    စိတ်ဆိုး ချင်လား ၊ ရယ်ချင်ချင်လား ၊ မချိပြုံးလေး ပန်ဆင်ချင် သလား ... မတားပါဘူး ။ ဆိုစကားရှိလာ
အောင် ဖြစ်တာတွေက ဖြစ်လာခဲ့ပြီးပြီကိုး ။

      မကြာခင်က ဝန်ကြီးတစ်ယောက်က အပစ်ခတ်ရပ်မယ့် အဖွဲ့တွေအတွက် မှတ်ပုံတင် (အာဏာပိုင်တွေ
သတ်မှတ်ထားတဲ့ တရားဝင်ဘဝ) ရဖို့နဲ့ စီးပွားရေး လုပ်ကိုင်ခွင့်တွေအကြောင်း ပြောသွားခဲ့တယ် ။ ခုလည်း
KNU က တာဝန်ရှိသူတစ်ယောက်က မှတ်ပုံတင်လုပ်ဖို့ စကားတွေ ပစ်လာပြန်တော့ ၊ တိုက်ဆိုင်မှုလေလား၊
မရည်ရွယ်ပဲ မီဒီယာတွေဆီ သတင်းရောက်သွားတာလား ၊ သို့တည်းမဟုတ် မှတ်ပုံတင်ရဖို့ဟာ အင်မတန်
အရေးကြီးပြီး မဖြစ်မနေ ပထမဆုံး လုပ်ရမယ်လို့ သဘောထားလုပ်နေကြလားတော့ ကာယကံရှင်တွေက
ပိုသိမှာပါ ။ ဘေးလူတစ်ယောက် အနေနဲ့ အံ့ချီးလို့မကုန်နိုင်တဲ့ အဖြစ်တစ်ခုလိုသာ ကြားသိခံစား ပြောကြား
ခွင့်ရှိပါတော့တယ် ။

      နားလည်မိတာတော့ ၊ ဖြစ်ခဲ့တဲ့ ၆၃ နှစ်ကြာ ပြဿနာဟာ မှတ်ပုံတင်ပြဿနာ မဟုတ်ပါဘူး ။ နိုင်ငံ
သားဖြစ်မဖြစ် ပြဿနာ မဟုတ်ပါဘူး ။ အရင်ကလည်း ပြောဖူးပါတယ် ၊ ဗမာစကား ကရင်စကား ဘယ်
နိုင်ငံခြားသားမှ ဒုက္ခခံ လာမသင်သလို ၊ မြန်မာပြည်သားဖြစ်ဖို့လည်း ဘယ်သူမှ ဆန္ဒမရှိ မကြိုးစားကြပါ
ဘူး ။ သမိုင်းတင်ခဲ့တဲ့ အနှစ်တစ်ထောင်လောက်အတွင်း မြန်မာပြည်မှာ မှတ်ပုံတင်ဆိုပြီး ဖြစ်လာတာ ခု
မှပါ ။

     ကျတော်တို့ ဘိုးဘွားတွေ ဒီမြေမှာ မှတ်ပုံတင်ပြီး ရောက်လာ ၊ မွေးလာ ၊ နေလာကြတာ မဟုတ်ပါဘူး ။
မှတ်ပုံတင်ဆိုတာဟာ ဒေသတစ်ခု သို့မဟုတ် တိုင်းပြည်တစ်ပြည်ကို ထိန်းချုပ်ကြပ် မတ်ဖို့ရာ လူတွေကို နံ
ပါတ်တပ်ပေးတဲ့ အုပ်ချုပ်ရေးလုပ်ငန်း အစိတ်အပိုင်းတစ်ခုသာသာပါ ။ တကယ်လုပ်ချင်ရင် ပြည်မအာဏာ
ပိုင်တွေမှ မဟုတ်ပါဘူး ၊ တိုင်းရင်းသား အဖွဲ့အစည်းတိုင်းက လုပ်ချင်ရင် လုပ်လို့ရနေတဲ့ အလုပ်ပါ ။

     ထားပါတော့ ။
     အစဘက်ကို ပြန်ကောက်ကြည့်မယ်ဗျာ ။
    မကြာခင်အတွင်းကတော့ အများသိကြသလိုပဲ ပျဉ်းမနားမြို့သစ်အစိုးရနဲ့ KNU ကြားမှာ အားတက်စရာ
အပစ်ခတ်ရပ်ဖို့သတင်းတွေ ထွက်လာခဲ့ပါတယ်။

      အမှန်အတိုင်း ဝန်ခံရရင် KNU ဟာ သမိုင်းရှည်ခဲ့တဲ့ အဖွဲ့ ၊ အစဉ်အလာရှိတဲ့ အဖွဲ့တစ်ဖွဲ့ဆိုတာ နား
လည်ပေမယ့် ၊ ကမ္ဘာရဲ့ တုန့်ပြန်မှုကိုတော့ ဒီလောက်ကြီးရှိမယ် မထင်ခဲ့မိဘူး ။

     ဇန္နဝါရီလ ၁၂ ရက်နေ့ ၊ အပစ်ရပ် ပဏာမလက်မှတ်ထိုးပြီး နောက်တစ်နေ့မှာပဲ ၊ Al Jazeera, Time,
CNN တွေက စလို့ သတင်းဋ္ဌာနကြီးတိုင်းလိုလိုမှာ ဖေါ်ပြတာ တွေ့ခဲ့ရတာကြောင့် အံသြသွားမိတယ် ။ မ
အိုသေးတဲ့သူ အပျိုလေးနဲ့တူ ၊ နွားပျိုသန်လှ နွားအိုပေါင်ကျိုးသလောက်ပဲရှိတယ် လို့ပဲ ပြောရမလား မပြော
တတ်ပါ ။ KNU အဖွဲ့ဝင်တစ်ယောက် မဟုတ်လို့ အလွန်ဂုဏ်ယူမိတာမျိုး မဟုတ်ပေမဲ့ ကိုယ်နဲ့ မလွဲမရှောင်
သာသက်ဆိုင်နေတဲ့ အဖွဲ့အစည်းဟာ စာဖွဲ့လောက်တဲ့ အဖွဲ့စည်းတစ်ရပ်အဆင့် ရှိတယ်ဆိုတာ ထင်ရှား
နေလို့ ဝမ်းလည်းသာမိတာတော့ အမှန် ။

      အိန္ဒိယနိုင်ငံရဲ့ ရှေးဦး ကွန်ကရက်ပါတီထက်တောင် ၁ နှစ်စောပြီး ၁၈၈၁ မှာ တည်ထောင်ခဲ့တဲ့ “ဒေါက
လူ” အဖွဲ့ကနေတစ်ဆင့် ဆင်းသက်လာတဲ့ KNU အဖွဲ့ဟာ ခြောက်ပစ်ကင်းစင်ပြီး အင်မတန်အောင်မြင်နေ
တယ်လို့ ပြောဖို့မဖြစ်နိုင်ပေမဲ့ အဓိကအစဉ်အလာအနေနဲ့ အင်အားမမျှတဲ့ ပြည်မအာဏာပိုင်တစ်ခုကို နှစ်
ပေါင်း ၆၀ ကျော်ကြာအောင် ရင်ဆိုင်နေနိုင်ခဲ့တာကို ပြည်တွင်းက မသိကြ ၊ အသိမှတ် မပြုချင်ကြပေမဲ့ တ
ကမ္ဘာလုံးကတော့ သိနေကြ မမေ့ကြဖူး ဆိုတာသိရလို့လည်း ဝမ်းသာတာပါ ။

      လတ်တလော အတွေးထဲ ရှိသလောက်ကတော့ ပြည်မအာဏာပိုင်တွေဖက်က -

(က) ဆွေးနွေးပွဲတိုင်း third-party observer တွေထားဖို့ ဘယ်တုန်းကမှ လက်မခံတာ ၊
(ခ) အမြဲတန်း သူတို့ခွင်ထဲကိုခေါ်ပြီး အသာစီးယူ စကားပြောတာ ၊
(ဂ) တိုင်းရင်းသားအရေးကို အရင်းအမြစ်အထိ နားလည်လက်ခံပုံ မရတာနဲ့ သူတို့သတ်မှတ်တဲ့ သတ်မှတ်
ချက် ဘောင်တွေအတွင်းဝင်ဖို့နဲ့ အခွင့်အရေးတစ်ချို့နဲ့ ပေးစာ ကမ်းစာတစ်ချို့လောက်ရရင် ကျေနပ်သွား
ကြမယ်လို့ ထင်နေပုံရတာတွေဟာ မြင်သာနေပါတယ် ။

      ဒါမျိုးတွေဟာ ပြည်မအာဏာပိုင်တွေ ဖြစ်စေချင်တဲ့ ပုံစံဖြစ်သလို ၊ ဒါနဲ့ ပတ်သက်ပြီး ကာလကြာရှည်
ဝါဒဖြန့်ထားတာတွေကြောင့်လည်း ဒီလိုသာ ဖြစ်သင့်တယ်လို့ ယူဆထားသူ ပြည်မသားတွေ အများကြီးဆို
တာလည်း နားလည်ပါတယ် ။

      KNU ဖက်ကတော့ ဘယ်လောက်အထိ brain-storm လုပ်ခဲ့သလဲ ၊ နိုင်ငံရေးအပါဝင် အရေးကိစ္စ
အားလုံးမှာ ဘယ်လောက်အထိ မဟာဗျူဟာ နည်းဗျူဟာတွေချပြီးသလဲ မသိရပေမယ့် ၊ အနည်းဆုံးတော့
သတင်းတင်ပြတဲ့ မီဒီယာအပိုင်းမှာ ကိုယ်ပိုင်မဟုတ်တဲ့ သတင်းဋ္ဌာနတွေအပေါ် အားကိုးနေရတာဟာ အ
တော်ကလေးကို အားရစရာမရှိ ဖြစ်နေပါတယ် ။ ဒါက တစ်ခုပဲ ရှိပါသေး တယ် ၊ အချို့အချက်တွေကိုတော့
အမြတ်ထုတ်ချင်သူအချို့ကို သူခိုးလမ်းပြဖြစ်မှာစိုးလို့ မပြောချင် တော့ပါဘူး ။

     ဒီနေရာမှာ မပြောချင်ပေမဲ့ တစ်ဆက်ထဲ ပြောစရာတစ်ခုကတော့ ကဖျက်ကယက် သမားတွေပါ ။
     ကရင်လူထုထဲမှာ ခံစားချက်နောက်လိုက်သူ ၊ ကိုယ် ဘယ်ခေတ်ရောက်နေမှန်း ရိုးရိုးသားသား မသိသူ
တွေ ရှိသလို ၊ ပြည်မဖက်မှာလည်း အာဏာပိုင်တွေရဲ့ ဝါဒဖြန့်ချက်တွေကို တစ်ထစ်ချယုံ ကြည်သူ ၊ တမင်
အနိုင်ကျင့်ချင်သူနဲ့ အလုပ်အကိုင် ဝါသနာအရ အားနည်းသူတွေကို အချွန်နဲ့ ‘မ’ ၊ အရေးမပါအောင်လုပ် ၊
ဖိနင်းချိုးဖဲ့ လမ်းလွဲမယ့်သူတွေ အများကြီးရှိတာကြောင့် ၊ ဒါတွေကို တုန့် ပြန်ချေဖျက်နိုင်ဖို့အပါဝင် သမိုင်း
ယဉ်ကျေးမှုအနုပညာ စာပေဗဟုသုတတွေသာမက အသင်းအဖွဲ့တွေရဲ့ ရှင်းလင်းပြတ်သားပြည့်စုံတဲ့ လုပ်
ငန်းစဉ်ချပြမှုတွေကို လူတိုင်းလက်ထဲရောက်အောင်လုပ်ဖို့ အချိန်တန်နေပါပြီ ။

      ခုရက်ပိုင်းအတွင်း ထုတ်ပြန်ခဲ့တဲ့ KNU စာတစ်စောင်မှာတော့ ပညာရှင်တွေရဲ့ အကြံဥာဏ်တွေကို ရယူ
သွားမယ်လို့ ပါတာကြောင့် အားလည်းတက်မိပါတယ် ။ တစ်ခုပဲ ပြောစရာရှိတာက ဆက်သွယ်အကြံပေးဖို့
ဘာကြားခံမှမရှိပဲ တိုက်ရိုက်ပြောဖို့ ဖုန်းနံပါတ်တွေပဲ ထည့်ထားတာကြောင့် အကယ်၍များ အကြံလှိုင်းစူနာ
မီကြီးများ ရိုက်ခတ်လာခဲ့ရင် နာမည်ထည့်ထားတဲ့ ပုဂ္ဂိုလ်ကြီးနှစ်ဦးမှာ အိပ်ချိန်မှ ရပါ့မလားလို့လည်း အတွေး
ခေါင်မိတယ် ။

    KNU ဟာ ကရင်တစ်မျိုးသားလုံး ကိုယ်စားပြုတဲ့အဖွဲ့လို့ မပြောချင်ပေမဲ့ ၊ အစဉ်အလာရှိပြီး ကျယ်ကျယ်
ပြန့်ပြန့် လုပ်ကိုင်နိုင်တဲ့အဖွဲ့မို့ ဆုံးဖြတ်လုပ်ဆောင်ချက်တိုင်းဟာ ကရင်ပြည်သူတွေရဲ့ ရှေ့ရေးမှာ သက်
ရောက်မှုတွေ အများကြီး ရှိလာနိုင်တာမို့ မပြောမဖြစ် ပြောရတာပါ ။ ခုလိုတွေပြောတာတောင် ကြီးကျယ်
တယ် အမြင်ကျဉ်းတယ် ကိုယ့်ဖက်ကိုယ်ယက်တဲ့ လူလည် စသည်ဖြင့် အပြောခံရနိုင်တာပါပဲ ။ မပြောမဖြစ်
လို့ ယုံကြည်တော့လည်း ဒါတွေကို လျစ်လျူရှုသင့် ရှုရတော့မှာပဲ ။

      ဘယ်လိုပဲဖြစ်ဖြစ် အကျဉ်းရုံးရရင် မြန်မာပြည်ရဲ့ အရေးကိစ္စတွေမှာ အဓိက ကစားသမားတွေအတွက်
ရွေးစရာလမ်း အများကြီး မရှိလှပါဘူး ။ ဒီလို အင်မတန် နည်းပါးကျဉ်းမြောင်းတဲ့ လမ်းတွေကို လျှောက်
လှမ်းရာမှာ ပြင်ဆင်မှုတော့ လိုပါလိမ့်မယ် ။

     ဒါတွေကို လူကြီးတွေ သိပြီးဖြစ်မှာပါလို့ အကောင်းဖက်က မျှော်လင့်ချင်ပါတယ် ။
     အခြားတစ်ဖက်မှာလည်း ကံကိုယုံပြီး ဆူးပုံလည်း မနင်းချင်လို့ စတိသဘောမျိုး ပြောရတာပါ ။

      KNU အဖွဲ့ကြီးအနေနဲ့လည်း ကရင်ပြည်သူတွေထဲက တစ်ယောက်ဖြစ်တဲ့ ကျနော်တစ်ယောက်ထဲ
မကပဲ ၊ ကျယ်ကျယ်ပြန့်ပြန့် အမြင်တွေကို စိတ်လိုလက်ရနဲ့ နားထောင် ချင့်ချိန် တွက်ဆ လုပ်ကိုင်သွား
ကြမယ်လို့ မျှော်လင့်ရင်း …

အနန္တသစ္စာဖြင့်
မန်းကိုကို
၂၈ ၊ ၀၁ ၊၂၀၁၂
** ကျနော်ပြောတာကို နားထောင်လိုက်လုပ်ပြီး အောင်မြင်ချမ်းသာသွားသူ ၊ ပြည့်စုံသွားသူတွေ မရှိသေးတာမို့ ကျနော့်ပြော

စကားတွေကို နားထောင်ပါလို့တော့ မပြောလိုပါဘူး ။ ဒါပေမယ့် ပြည်သူထဲက ပြည်သူတစ်ယောက်အနေနဲ့ ကျနော့်စကားကို

တော့ နားထောင်ကြည့်ကောင်း နားထောင်ကြည့်လိမ့်မယ်လို့ ယုံကြည်ပါရစေ ။

တရားမ၀င်ကုန်သွယ်မှုနှုန်းမြှင့် တက်ကြောင်းမြန်မာအစိုးရ၏ပြော ဆိုချက် KNU ငြင်းဆို

2012-01-29T09:08:00.000+11:00

Saturday, 28 January 2012

ဇန်န၀ါရီ ၂၈ရက်၊ ၂၀၁၂ခုနှစ်။ ရွှေသိုက်တော (ကေအိုင်စီ)

မြန်မာအစိုးရနှင့် ကရင်အမျိုးသားအစည်းအရုံး-KNU တို့အကြား ယခုလဆန်းပိုင်းက အပစ်အခတ်ရပ်စဲရေးဆိုင် ရာသဘောတူ လက်မှတ်ရေးထိုးပြီးနောက်ပိုင်း ထိုင်း-မြန်မာနယ်စပ် မဲဆောက်-မြ၀တီလမ်းကြောင်း၏ တရားမ၀င် ကုန်သွယ် မှုနှုန်း မြှင့်တက်လာခဲ့ကြောင်း ကရင်ပြည်နယ်အစိုးရ စီးပွားရေးဝန်ကြီး၏ ပြောဆိုချက်မှာ အခြေအမြစ်မရှိဟု KNUက တုံ့ပြန်ပြောကြားလိုက်သည်။

ယခုလ ၂၃ရက်နေ့က နေပြည်တော်တွင် ပြုလုပ်သည့် တရားမ၀င်မှောင်ခို ပစ္စည်းတင်သွင်း မှုကို အရေးယူမည့် ထုတ်လုပ်မှုနှင့် ကုန်သွယ်မှုမြှင့်တင်ရေး ဆွေးနွေးပွဲတွင် ကရင်ပြည် နယ်အစိုးရ စီမံကိန်းနှင့် စီးပွားရေးဝန်ကြီး ဦးနိုင်မင်းစိုးသိန်း၏ ပြောဆိုချက်ကို KNU ဒုဥက္ကဌ ပဒိုဒေးဗစ်သကဘောက တုံ့ပြန်ပြောဆိုခြင်းဖြစ်သည်။

၎င်းက “ကျနော်တို့ အပစ်ခတ်ရပ်စဲရေးကလည်း ဘာမှ တိတိကျကျသေသေချာချာ ဆောင် ရွက်ထားတာ မရှိသေးဘူး။ ဒီအပစ်ခတ်ရပ်စဲရေး အတွက်ကိုပဲ အများကြီး ဆက်လက်ဆွေး နွေးရအုံးမယ်။ ဒီမှောင်ခို ကိစ္စကတော့ KNUနဲ့လည်း မပတ်သက်ဘူး။ ကျနော်တို့ ကရင် လူမျိုးတွေလည်း မပတ်သက်ဘူး။ ဒီတရားမ၀င် ကုန်သွယ်ရေး ကိစ္စက အစကတည်းကရှိ နေတာဖြစ်တယ်။”ဟု ပြောသည်။

မြန်မာအစိုးရနှင့် KNUတို့အကြား ယခုလ ၁၂ရက်နေ့က ဘားအံမြို့တွင် နှစ်ဖက်အပစ် အခတ်ရပ်စဲရေးအတွက် ပဏာမ သဘောတူ လက်မှတ်ရေးထိုးခဲ့ကြသော်လည်း အပစ် ခတ်ရပ်စဲရေးဆိုင်ရာ ကိစ္စရပ်များနှင့် နိုင်ငံရေးဆိုင်ရာ ကိစ္စရပ်များကို ဆက်လက်ဆွေးနွေး သွားရန်ရှိပြီး ဆွေးနွေးပွဲ ကာလအတွင်း စီးပွားရေးလုပ်ငန်းနှင့် အခြားဆက်စပ်လုပ်ငန်း များကို လုပ်ကိုင်ရန် လုံးဝအစီအစဉ်မရှိဟု KNUဘက်က ပြောသည်။

သို့သော် မြန်မာကုန်သည်ကြီး တစ်ဦးဖြစ်သည့် ဦးအောင်ဝင်းက မြန်မာနိုင်ငံ၏ ဒုတိယ အကြီးဆုံး နယ်စပ်ကုန်သွယ်ရေး လမ်းကြောင်းဖြစ်သည့် မဲဆောက်-မြ၀တီတွင် တရား မ၀င် မှောင်ခိုပစ္စည်း အပြန်အလှန် တင်ပို့မှုမှာ လွန်ခဲ့သည့် နှစ် ၂၀ခန့်က စတင်ခဲ့သည်ဟု ပြောသည်။

၎င်းက “ဒီလမ်းကြောင်းမှာ လုပ်တဲ့နယ်စပ်ကုန်သွယ်ရေးက တရားဝင်နဲ့ တရားမ၀င်တဲ့ နည်းတွေကို တွဲပြီး သုံးနေရတယ်။ ဒါက နှစ်ဖက် တာဝန်ရှိသူတွေရဲ့ ကုန်သွယ်မှုဆိုင်ရာ လုပ်ထုံးလုပ်နည်းတွေ အားနည်းလို့ ဖြစ်တယ်။ အထူးသဖြင့် မြန်မာဘက်က ကုန်သွယ်မှု လုပ်ငန်းဆိုင်ရာ ပြဌာန်းချက်တွေကို လျော့ပေါ့ပြီး စဉ်းစားပေးမယ်ဆိုရင် ဒီတရားမ၀င် ကုန်သွယ်မှုဟာ လျော့နည်းသွားမှာ ဖြစ်တယ်။”ဟု ဆိုသည်။

ထို့အပြင် စီးပွားရေးနှင့် ကူးသန်းရောင်းဝယ်ရေး ပြည်ထောင်စုဝန်ကြီး ဦးဝင်းမြင့်ကလည်း မြန်မာနိုင်ငံအတွင်း တရားမ၀င်မှောင်ခို ပစ္စည်းများ တင်သွင်းမှုကို ၃လ အတွင်း ကန့်သတ် အရေးယူမှုများ ပြုလုပ်မည်ဟု ယခုလ ၂၃ရက်နေ့က နေပြည်တော်တွင် ပြုလုပ်သည့် ထုတ်လုပ်မှုနှင့် ကုန်သွယ်မှုမြှင့်တင်ရေး ဆွေးနွေးပွဲ၌ ပြောကြားခဲ့သည်။

ကရင်ပြည်နယ် အခြေစိုက် နိုင်ငံရေးပါတီတခုမှ ခေါင်းဆောင်တစ်ဦးက “အစိုးရနဲ့ KNU ကြားမှာ ပြုလုပ်နေတဲ့ ငြိမ်းချမ်းရေး လုပ်ငန်းစဉ်က အစပဲရှိသေးတယ်။ နှစ်ဖက်တာဝန်ရှိ သူတွေအနေနဲ့ အပြောအဆိုတွေကို ထိန်းထိန်းသိမ်းသိမ်း ပြောဖို့လိုအပ်ပါတယ်။ အခု ကရင်ပြည်နယ်ဝန်ကြီး ပြောပုံအရဆိုရင် KNUက တရားမ၀င် မှောင်ခိုပစ္စည်း တင်ပို့မှုတွေ လုပ်နေတယ်ဆိုတဲ့ သဘောသက်ရောက်နေတယ်။”ဟု ဝေဖန်ပြောဆိုခဲ့သည်။

ထိုင်း-မြန်မာနယ်စပ် ကုန်သွယ်ရေးတွင် မဲဆောက်ဘက်မှ မြ၀တီ ဘက်သို့ တရားဝင် တင်ပို့နေသည့် ထိုင်းထုတ်ကုန်များမှာ တလလျှင် ထိုင်းဘတ်ငွေ သန်း ၃,၀၀၀ ခန့်ရှိပြီး တရားမ၀င်တင်ပို့မှုမှာလည်း ဆတူနီးပါးခန့် ရှိသည်ဟု ထိုင်းကုန်သည်ကြီးများက ပြောသည်။

တဆက်တည်း၌ပင် လက်ရှိ မြန်မာနိုင်ငံ ပြည်တွင်းဈေးကွက်တွင် ရောင်းချနေသည့် တရားမ၀င် မှောင်ခို ပစ္စည်းအများစုမှာ ထိုင်း-မြန်မာနယ်စပ် မြ၀တီနှင့် တရုတ်-မြန်မာနယ်စပ် မူဆယ်လမ်း ကြောင်းများမှတဆင့် ၀င်ရောက်လာသည့် ပစ္စည်းများ ဖြစ်သည်ဟု မြန်မာကုန်သည်ကြီးများကလည်း ပြောဆိုနေကြသည်။

ပဏာမငြိမ်းချမ်းရေးကာလ ကရင်ပြည်နယ် လုံခြုံရေး စိုးရိမ်နေရဆဲ

2012-01-29T09:02:00.000+11:00

Friday, 27 January 2012

ဇန်န၀ါရီ ၂၆ ရက်၊ ၂၀၁၂ခုနှစ်။ နန်းသူးလေ (ကေအိုင်စီ)

ကရင်အမျိုးသား အစည်းအရုံး(KNU)နှင့် မြန်မာအစိုးရကြား ပဏာမအဆင့် ငြိမ်းချမ်းရေး သဘောတူညီမှု ရပြီးဖြစ်သော်လည်း ကရင်ဒေသအတွင်း ဆေးကုသမှု ဆောင်ရွက်ပေးရာတွင် လုံခြုံမှူမရှိ စိုးရိမ်နေရဆဲ ဖြစ်ကြောင်း နယ်လှည့်ကျောပိုးအိတ် ကျန်းမာရေးလုပ်သားအဖွဲ့ (BPHWT) က ပြောသည်။

“တကယ်တမ်း ကျနော်တို့နဲ့ နီးစပ်တဲ့ အသိုင်းအ၀ိုင်းကို ကြည့်တာ အောက်ခြေထိ စစ်ရေး ပြင်ဆင်မှုတွေ မလုပ်ရဖူးဆိုတာတွေ ညွန်ကြားတာတွေလည်း မတွေ့ရသလို တဖက်နဲ့ တဖက် နယ် ကျော်လာမယ်ဆိုရင် တိုက်ပွဲတွေ ဖြစ်လာမယ် ဆိုတာတွေကို ကျနော်တို့မြင်နေရဆဲပါ ” ဟု BPHWT ညွန်ကြားရေးမှူး စောဝင်းကျော် က ပြော သည်။

လက်မှတ်ရေးထိုး ထားရုံနှင့် စစ်မှန်သည့် ငြိမ်ချမ်းရေး အာမခံချက် မရှိသဖြင့် ကျန်းမာ ရေးအဖွဲ့များ လှုပ်ရှား သွားလာရသည်မှာ ကြောက်ရွံ့မှုများ ရှိနေသည်ဟု ၎င်းက ဆက်ပြောသည်။
ကေအဲန်ယူနှင့် မြန်မာ အစိုးရသည် ယခုလ ၁၂ ရက်နေ့ တွင် ပဏမငြိမ်းချမ်းရေး သဘောတူ လတ်မှတ်ရေးထိုးခဲ့ပြီးနောက် ၄၅ ရက်အတွင်း ပြည်ထောင်စုအဆင့် ငြိမ်းချမ်းရေး ဆွေးနွေးရေး အဖွဲ့ နှင့် ဆက်လက်ဆွေးနွေးရန် သဘောတူညီခဲ့ကြသည်။

လက်ရှိ အခြေအနေတွင် တိုက်ခိုက်မှုများ မရှိသော်လည်း အစိုးရတပ်များ ဘက်မှ ရိက္ခာသယ်ယူမှုကို ကရင် တပ်များဘက်မှ တားဆီးမှုများ ဖြစ်လာနိုင်သည်ဟု စိုးရိမ်မှုများ ပေါ်ပေါက်နေသဖြင့် ကျန်းမာ ရေးလုပ်သားများ အနေဖြင့် ထိုအခြေအနေ အကြား သတိဖြင့် သွားလာနေရသည်ဟု စောဝင်းကျော်က ပြောသည်။

ကေအဲန်ယူ အုပ်ချုပ်ရေးနယ်မြေများဖြစ်သည့် ဖာပွန်ခရိုင်၊ဘားအံခရိုင်၊ ထားဝယ်ခရိုင် အပါအ၀င် ခရိုင် (၇)ခုတွင် ကျန်းမာရေး ကူညီစောင့်ရှောက်မှုများ ပေးနေသည့်ထိုအဖွဲ့ သည် ပြီးခဲ့သည့်နှစ် အောက်တိုဘာ၂၉ ရက်နေ့က ကရင်ပြည်နယ်၊ ဖာပွန်မြို့ နယ် မာထောကျေးရွာ အုပ်စုအတွင်း ဆေးကု သွားစဉ် ကျန်းမာရေးဝန်ထမ်းနှစ်ဦး အစိုးရစစ်တပ်မှ ဖမ်းဆီးခြင်း ခံခဲ့ရသည်။

၎င်းတို့နှစ်ဦးကို ယခုလ ၁၉ ရက်နေ့ကမှ အစိုးရက ပြန်လွှတ်ပေးခဲ့သည်ဟု ကျန်းမာရေး စောင့်ရှောက်မှု ဆောင်ရွက်ပေးနေသည့် ၀န်ထမ်းများက ပြောသည်။

၁၉၉၈ခုနှစ် သြဂုတ်လတွင် စတင် ဖွဲ့စည်းခဲ့သည့် နယ်လှည့်ကျောပိုးအိတ် ကျမ်းမာရေး လုပ်သား အဖွဲ့ သည် စစ်ဖြစ်သည့် ဒေသများအတွင်း တိုက်ပွဲများမှ ရရှိသည့် ဒဏ်ရာများ၊ ငှက်ဖျားရောဂါ၊ ၀မ်း ပျက်ဝမ်းလျှော၊ အသက်ရှုလမ်းကြောင်း ရောဂါများ၊ မိခင်နှင့် ကလေးများအတွက် လိုအပ်သည့် ပြုစု စောင့်ရှောက်မှုများကို အဓ်ိကဆောင်ရွက်ပေးလျက်ရှိသည်။

ထို့အပြင် ရပ်ရွာအတွင်း လူထုနှင့် ပူးပေါင်းပြီး ရေလုံအိမ်သာများ တည်ဆောက်ပေးခြင်း၊ ရေသန့် ရရှိရန်အတွက် ရေပိုက်များသွယ်ပေးခြင်း၊ ကျန်းမာရေး မြှင့်တင်မှုလုပ်ငန်းများ၊ ပညာပေး ဆွေးနွေး ပွဲများကို ဒေသအလိုက် ၆ လတစ်ကြိမ် လုပ်ဆောင်ပေးသည်ဟု စောဝင်းကျော်က ပြောသည်။

နယ်လှည့်ကျောပိုးအိတ် ကျန်းမာရေးလုပ်သားအဖွဲ့(BPHWT)သည် နိုင်ငံတကာအဖွဲ့အစည်းများမှ ကူ ညီထောက်ပံ့မှုဖြင့် ကျန်းမာရေး ကူညီစောင့်ရှောက်မှုများကို ပေးနေခြင်း ဖြစ်သည်။